გიორგი ხასაია და აკაკი ჩიქობავა სააპელაციო სასამართლომ პატიმრობაში დატოვა

„ორივე მათგანი აღიარებს ჩადენილ ქმედებას, ანუ ქონების დაზიანებას და მზად არიან, რომ აანაზღაურონ ეს ზიანი. ჩვენი მხრიდან აღსრულების ეროვნულ ბიუროსთან აქტიური კომუნიკაცია იყო, რომ ეს პროცესები დროულად წარმართულიყო. ამ გარემოებების მიუხედავად, სააპელაციო სასამართომ ძალაში დატოვა პატიმრობის გადაწყვეტილება, რაც ნამდვილად პრობლემური და უსამართლოა.

ეს ყველაფერი უკვე ემსგავსება იმას, რომ თითქოს ეს ღონისძიებები ემსახურება არა მართლმსაჯულების ინტერესებს, არამედ დაკავებულების მიმართ მკაცრი სადამსჯელო ხელის ჩვენებას“, - ამბობს დაკავებულების ადვოკატი გურამ იმნაძე.

30 იანვარს საქმის პროკურორმა როინ ხინთიბაძემ განაცხადა, რომ ბრალდების მხარე მზად იყო, პატიმრობის უფრო ნაკლებად მკაცრი აღკვეთის ღონისძიებით შეცვლა მოეთხოვა, თუ ბრალდებულები ჩადენილ დანაშაულს აღიარებდნენ და ზიანს აანაზღაურებდნენ.

მოსამართლე დავით კურტანიძემ თბილისის სახელმწიფო უნივერსიტეტის ლექტორს, აკაკი ჩიქობავასა და ილიას სახელმწიფო უნივერსიტეტის დოქტორანტს, გიორგი ხასაიას აღკვეთის ღონისძიების სახით პატიმრობა 25 იანვარს შეუფარდა. მათ ბრალად აღსრულების ეროვნული ბიუროს კუთვნილი ავტომობილის განზრახ, ჯგუფურად დაზიანება ედებათ, რაც 3-დან 6 წლამდე ვადით თავისუფლების აღკვეთით ისჯება. პროკურატურის მტკიცებით, ბრალდებულების ქმედების შედეგად სახელმწიფოს 3380 ლარის ზიანი მიადგა. შემდეგი პროცესი სასამართლოში 18 მარტს არის ჩანიშნული.

პოლიციამ 23 იანვარს, ხატიაშვილების ოჯახის გამოსახლების წინააღმდეგ გამართულ აქციაზე სულ 20 ადამიანი დააკავა. მათგან 18 - ადმინისტრაციული წესით, წვრილმანი ხულიგნობისა და პოლიციის კანონიერი მოთხოვნისადმი დაუმორჩილებლობის მოტივით. დაკავებულების ნაწილი სასამართლომ სამართალდამრღვევად ცნო და 2000-2000 ლარის ოდენობით ჯარიმა დააკისრა. მოსამართლე ნინო შჩერბაკოვმა 2000 ლარით დააჯარიმა აქციის გაშუქების დროს უკანონოდ დაკავებული ჟურნალისტი გელა მთივლიშვილი. სასამართლო პროცესები ჯერ დასრულებული არ არის.