Almaniya kanslerinin “xarici agentlər” haqqında rus qanunu ilə bağlı mövqeyi dəyişməzdir. Mayın 15-də Olaf Şolz bu barədə İsveçrə Konfederasiyasının federal prezidenti Viola Amherdlə birgə keçirdiyi mətbuat konfransında Gürcüstanda baş verənlərlə bağlı ünvanlanan sualdan sonra bildirib.
Əsas xəbərlər
“Mən Gürcüstanın baş naziri ilə bu yerdə dayandım və aydın və birmənalı şəkildə dedim ki, mən bu qanunu səhv hesab edirəm və qəbul edilməməli idi. İndi qəbul olunduqdan sonra onda heç nə dəyişməyib”, - kansler qeyd edib.
Aprelin 12-də Olaf Şolz Gürcüstanın baş naziri İrakli Kobaxidze ilə görüşdən sonra keçirilən mətbuat konfransında Gürcüstan parlamentinin Avropa İttifaqı və Gürcüstan əhalisinin tənqidi mövqeyini nəzərə alacağına və “xarici agentlər” haqqında qanunu qəbul etməyəcəyinə ümid etdiyini bildirib.
Gürcüstan parlamenti rus qanununu mayın 14-də keçirilən plenar iclasında üçüncü, yekun oxunuşda qəbul edib. 84 deputat onu dəstəkləyib, 30 deputat isə əleyhinə çıxıb. Qanunun lehinə “Gürcü Arzusu” və “Xalq hakimiyyəti” ilə yanaşı, “Avropa Sosialistləri”nin iki üzvü də səs verib.
Hüquq Komitəsi və plenar iclaslarda müzakirə olunmadan “Gürcü Arzusu” qanunun son variantında fiziki şəxslərin üzərinə tələb olunan məlumatları Ədliyyə Nazirliyinə təqdim etmək öhdəliyi qoyan dəyişiklik edib. Nazirlik həmçinin şəxsin siyasi baxışları, dini və ya fəlsəfi inancı, sağlamlıq vəziyyəti və cinsi həyatı ilə bağlı məlumatları tələb edə biləcək. Tələb olunan məlumatların təqdim edilməməsi halında 5000 lari məbləğində cərimə nəzərdə tutulur.
Prezident rus qanununa veto qoymaq niyyətindədir. Bununla belə, “Gürcü Arzusu” Salome Zurabişvilinin əsaslandırılmış qeydlərinə məhəl qoymayaraq, vetonu aşa bilər.
