Այս օրենքը սխալ եմ համարում, ոչինչ չի փոխվել. Շոլցը՝ ռուսական օրենքի մասին

«Ես այստեղ կանգնած էի Վրաստանի վարչապետի հետ և հստակ ու միանշանակ ասացի, որ կարծում եմ, որ այս օրենքը սխալ է, և այն չպետք է ընդունվեր։ Հիմա, երբ այն ընդունվել է, ոչինչ չի փոխվել»,- նշել է կանցլերը։

Ապրիլի 12-ին Օլաֆ Շոլցը Վրաստանի վարչապետ Իրակլի Կոբախիձեի հետ հանդիպումից հետո կայացած մամուլի ասուլիսում հույս հայտնեց, որ Վրաստանի խորհրդարանը հաշվի կառնի Եվրամիության և Վրաստանի բնակչության քննադատական ​​դիրքորոշումը և չի ընդունի այսպես կոչված «օտարերկրյա գործակալների» մասին օրենքը։ 

Վրաստանի խորհրդարանը մայիսի 14-ի լիագումար նիստում երրորդ՝ վերջնական ընթերցմամբ ընդունեց ռուսական օրենքը։ Օրինագծին կողմ է քվեարկել է 84 պատգամավոր, դեմ՝ 30։ Բացի «Վրացական երազանքից» և «Ժողովրդի ուժից», օրինագծի օգտին քվեարկել են նաև «Եվրոպացի սոցիալիստների» երկու անդամները։

Առանց իրավական հարցերի հանձնաժողովում և լիագումար նիստերում քննարկման՝ «Վրացական երազանքը» փոփոխություն է կատարել օրենքի վերջնական տարբերակում, որը ֆիզիկական անձանց պարտավորեցնում է արդարադատության նախարարությանը տրամադրել պահանջվող տեղեկատվությունը։ Նախարարությունը կարող է նաև պահանջել տվյալներ՝ անձի քաղաքական հայացքների, կրոնական կամ փիլիսոփայական համոզմունքների, առողջական վիճակի և սեռական կյանքի վերաբերյալ։ Պահանջվող տեղեկատվությունը չներկայացնելու դեպքում նախատեսված է 5000 լարի տուգանք։

Նախագահը մտադիր է վետո դնել ռուսական օրենքի վրա, սակայն «Վրացական երազանքը» կարող է հաշվի չառնել Սալոմե Զուրաբիշվիլիի դիտողությունները և հաղթահարել վետոն։