Daha bir Çin aviaşirkəti Çin və Gürcüstan arasında birbaşa sərnişin reysləri həyata keçirəcək. “Air China” dövlət şirkəti cari ilin sentyabr ayından etibarən Tbilisi ilə Urumçi arasında həftədə üç dəfə uçuşlar həyata keçirməyi nəzərdən keçirir.
Əsas xəbərlər
2023-cü ildə Çindən Gürcüstana səfərlərin sayı 48 304 nəfər təşkil edib ki, bu da 2022-ci illə müqayisədə 554,5% çoxdur. 2024-cü ilin iki rübünün məlumatlarına görə, Çindən 32 853 səfər həyata keçirilib. 2023-cü illə müqayisədə artım 159,5% təşkil edib.
İqtisadiyyat və Davamlı İnkişaf Nazirinin müavini Mariam Kvrivişvilinin sözlərinə görə, Gürcüstan hökuməti daha çox çinli turistin Gürcüstana gələ bilməsi üçün Çinin digər şəhərlərindən uçuşların başlanması ilə bağlı fəal danışıqlar aparır. Kvrivişvilinin sözlərinə görə, Gürcüstan və Çin arasında viza rejiminin ləğvi ikitərəfli danışıqlara əlavə stimul verib.
“Çin Gürcüstanın turizm sektoru üçün yeni prioritet istiqamətdir. Çindən gələn turistlər ənənəvi olaraq uzunmüddətli turları seçirlər və yüksək xərcləmə qabiliyyəti ilə xarakterizə olunurlar. Birbaşa uçuşların tezliyinin artırılması Çindən daha çox ziyarətçinin gəlməsinə kömək edəcək ki, bu da turizm və mülki aviasiya sektorlarının inkişaf dinamikasına müsbət təsir göstərəcək, həmçinin ikitərəfli ticarətə və iqtisadi əlaqələrə əlavə təkan verəcək”, - nazir müavini bildirib.
“Air China” Çinin ən böyük hava yolu şirkətidir. Bu günə olan məlumata görə, “China Southern Airlines” Gürcüstan və Çin arasında müntəzəm sərnişin reysləri həyata keçirir və cari ilin altı ayının məlumatına görə, o, Gürcüstanla Çin arasında 19 991 sərnişin daşıyıb. Urumçi-Tbilisi-Urumçi hava xətti ilə uçuşlar gündəlik həyata keçirilir.
2023-cü ilin yayında keçmiş baş nazir İrakli Ğaribaşvili və Çin prezidenti Si Cinpin strateji tərəfdaşlıq haqqında razılığa gəliblər. O vaxtdan bəri iki ölkə arasında vizasız gediş-gəliş yaradılıb. 29 may 2024-cü ildə Gürcüstanın İqtisadiyyat Naziri Levan Davitaşvili bəyan edib ki, Anaklia dərin su limanı strateji layihəsində özəl investor Çinin “China Communications Construction Company Limited” (CCCC) konsorsiumu olacaq. Amerika Birləşmiş Ştatlarının sanksiyasına məruz qalan “CCCC” strateji layihədə 49% paya sahib olacaq. ABŞ-ın Gürcüstandakı səfiri Robin Daniqan bildirib ki, “CCCC”nin əksər hissələri Çin Kommunist Partiyasına məxsusdur. “Çin Kommunist Partiyası bu gün Rusiya ordusunun bir nömrəli bankiri, bir nömrəli maliyyəçisidir. Beləliklə, bir sual yaranır ki, işğalçınızı maliyyələşdirən partiya ilə iqtisadi əlaqələri niyə dərinləşdirirsiniz? Çünki Rusiya ordusu Çin Kommunist Partiyası tərəfindən maliyyələşdirilir”, - ABŞ səfiri bildirib. Amerikalı diplomatın bu bəyanatını Çinin Gürcüstandakı səfirliyi absurd adlandırıb.
“Gürcü Arzusu”nun fəxri sədri Bidzina İvanişvili bildirib ki, Gürcüstanın Çinlə əməkdaşlığının dərinləşdirilməsi Amerika Birləşmiş Ştatları və Avropa İttifaqı ilə əməkdaşlığa alternativ deyil. İvanişvili iyulun 16-da partiyanın seçki kampaniyasının açılışında deyib: “Əksinə, bu, növbəti illərdə dərinləşdirilməli olan ümumi əməkdaşlıq üçün tamamlayıcı amildir”.
