Tbilisi Şəhər Məhkəməsinin Cinayət Məcəlləsi Kollegiyasının ömürlük hakimi Badri Koçlamazaşvili hakimlərin Amerika Birləşmiş Ştatlarına planlaşdırılan tədris məqsədli səfərində iştirakdan imtina edib. Onun sözlərinə görə, səfər siyasi əhəmiyyət kəsb edib və buna görə də o, artıq ABŞ-a getmək niyyətində deyil.
Əsas xəbərlər
“Tədris məqsədli səfəri yalnız peşəkar inkişaf məqsədi daşıyırdı və ona hər hansı başqa əhəmiyyət yükləmək əsassız idi. Lakin son günlər sözügedən səfərin kəskin siyasi əhəmiyyət kəsb etdiyi və hakimlərin bir hissəsinin getməsi və ya getməməsinin siyasi qiymətləndirmə obyektinə çevrildiyinə görə, peşəmin ciddi səciyyəviliyini nəzərə alaraq, peşəkar məqsədi ilə yanaşı, həm də siyasi məzmun kəsb edən belə bir səfərdə iştirak etməkdən imtina edirəm”, - hakim, sosial şəbəkədə yaydığı bəyanatda qeyd edir.
Badri Koçlamazaşvili ABŞ Dövlət Departamentinin Gürcüstanın üç cari və bir keçmiş hakiminə sanksiya tətbiq etməsindən sonra tədris məqsədli səfərdə iştirakdan imtina edən dördüncü hakimdir.
Ədliyyə Şurasının hakim üzvü Dimitri Qvritişvili aprelin 13-də məlumat yayıb ki, Tbilisi, Kutaisi və Batumi şəhər məhkəmələrinin hakimləri - Konstantine Kopaliani, Nana Coxadze və Tamar Bejanişvili aprelin 22-30-a planlaşdırılan tədris məqsədli səfər çərçivəsində ABŞ-a getməyəcəklər. Qvritişvili bu addımı həmrəylik aktı kimi qiymətləndirib, baxmayaraq ki, bir neçə gün əvvəl mətbuatda nüfuzlu hakimlərin tədris məqsədli səfərdə iştirak etmək istəyən həmkarlarına təzyiq göstərməsi xəbəri yayılırdı.
Aprelin 5-də ABŞ Dövlət Departamenti Tbilisi Apellyasiya Məhkəməsinin sədri Mixeil Çinçaladze, Tbilisi Apellyasiya Məhkəməsinin sədr müavini İrakli Şenqelia, Ali Ədliyyə Şurasının üzvü və Tbilisi Apellyasiya Məhkəməsinin ömürlük hakimi Levan Murusidzeyə sanksiya tətbiq edib. Bundan başqa, 2012-2017-ci illərdə Tbilisi Apellyasiya Məhkəməsinin sədri olmuş Valerian Tsertsvadze də sanksiyaya məruz qalanlar arasında olub. Dövlət Departamentinin məlumatına görə, bu şəxslər məhkəmə sədrləri və Ali Ədliyyə Şurasının üzvləri kimi öz vəzifələrindən sui-istifadə edərək, qanunun aliliyinə və ictimaiyyətin Gürcüstanın məhkəmə sisteminə etimadına zərbə vurublar. Mixeil Çinçaladze, İrakli Şenqeliya, Levan Murusidze və Valerian Tsertsvadze, eləcə də onların ailə üzvləri artıq ABŞ ərazisinə daxil ola bilməyəcəklər.
