Gürcüstanın Xarici İşlər Naziri İlya Darçiaşvili NATO-nun Vaşinqtonda keçirilməsi planlaşdırılan sammitinə dəvət olunub. Bu barədə “Amerikanın Səsi”nə ABŞ Dövlət Departamentinin sözçüsü Metyu Miller bildirib.
Əsas xəbərlər
Baş Nazir İrakli Kobaxidze və müdafiə naziri İrakli Çikovaninin dəvət olunub-olunmaması ilə bağlı suala Miller cavab verib ki, “Sülh Naminə Tərəfdaşlıqda [proqramında] iştirak edən digər ölkələr kimi, Gürcüstanın Xarici İşlər Naziri də müəyyən müşayiət olunan tədbirlərdə iştirak etmək üçün dəvət olunub”.
İlya Darçiaşvilinin sammitdə iştirak edib-etməyəcəyi hələlik məlum deyil. Metyu Miller Gürcüstandan sammitlə bağlı təsdiqi alıb-almadıqlarını soruşduqda, Gürcüstan hökumətinin niyyətləri barədə danışa bilməyəcəyini bildirib:
“Gürcüstan hökumətinin niyyətinə gəlincə, sizi Gürcüstan hökuməti ilə əlaqə saxlamağa dəvət edirəm. Biz “Gürcü Arzusu” hökumətini Gürcüstanın xalqının istədiyi və konstitusiyada göstərildiyi kimi Avro-Atlantika yoluna qayıtmaq üçün tez addımlar atmağa çağırırıq.
NATO-nun sammiti iyulun 9-11-də Vaşinqtonda keçiriləcək. Dünən, iyunun 27-də Baş Nazir İrakli Kobaxidze Gürcüstanın sammitdə təmsil olunacağını təsdiqləyib və bildirib ki, ABŞ-a kimin gedəcəyi daha sonra dəqiqləşdiriləcək.
Son zamanlar Gürcüstanla ABŞ arasında münasibətlər xüsusilə gərginləşib. “Gürcü Arzusu” hökuməti tərəfdaşlarının tənqidlərinə baxmayaraq, qondarma “xarici agentlər” haqqında rus qanunu qəbul edildikdən və etiraz aksiyalarını dağıtdıqdan sonra ABŞ ikitərəfli əməkdaşlığa, o cümlədən maliyyə yardımına yenidən baxmağa başlayıb. Bundan əlavə, Dövlət Departamenti viza sanksiyalarının birinci hissəsini açıqlayıb. Söhbət ABŞ ərazisinə girişi qadağan olunacaq onlarla nəfərdən, o cümlədən “Gürcü Arzusu”nun üzvlərindən, parlament deputatlarından, hüquq-mühafizə orqanlarının əməkdaşlarından və fərdi şəxslərdən gedir. Yayılan məlumatlara görə, sanksiya tətbiq edilənlər arasında “Gürcü Arzusu”nun deputatı Dimitri Samxaradze və Daxili İşlər Nazirliyinin Xüsusi Təyinatlılar İdarısinin direktoru Zviad Xarazişvili də var.
