ვაშინგტონში დაგეგმილ ნატოს სამიტზე საქართველოს საგარეო საქმეთა მინისტრი ილია დარჩიაშვილია მიწვეული. ამის შესახებ ამერიკის შეერთებული შტატები სახელმწიფო დეპარტამენტის პრესსპიკერმა, მეთიუ მილერმა „ამერიკის ხმას“ განუცხადა.
ახალი ამბები
მკითხველის რჩეული
- 1 მოსამართლემ გორში დაკავებული აქტივისტის საქმეზე ყველა საგამოძიებო მოქმედება უკანონოდ ცნო
- 2 რუსეთმა უკრაინაში მებრძოლ რუსუდან ივანეიშვილს პატიმრობა დაუსწრებლად მიუსაჯა
- 3 მასობრივად წაშალეს „მთის ამბების“ კრიტიკული მასალები ფეისბუკიდან
- 4 გვჭირდება კონკრეტული ნაბიჯები, რომლებიც შეაჩერებს საქართველოს ხელისუფლებას - ვანო ჩხიკვაძე
- 5 7 წლის წინ სიღნაღის პოლიციაში მოქალაქის ცემისთვის ყოფილ პოლიციელს ბრალი წარუდგინეს
- 6 აქტივისტ ზუკა ბერძენიშვილს თავს დაესხნენ პაპუაშვილის ფეისბუკპოსტიდან ერთ საათში
კითხვაზე, იყვნენ თუ არა მიწვეულები პრემიერ-მინისტრი ირაკლი კობახიძე და თავდაცვის მინისტრი ირაკლი ჩიქოვანი, მილერმა უპასუხა, რომ „პარტნიორობა მშვიდობისთვის [პროგრამაში ჩართული] სხვა ქვეყნების მსგავსად, საქართველოს საგარეო საქმეთა მინისტრი მოწვეულია გარკვეულ თანმხლებ ღონისძიებებში მონაწილეობის მისაღებად.“
ჯერჯერობით უცნობია, დაესწრება თუ არა სამიტს ილია დარჩიაშვილი. მეთიუ მილერმა შეკითხვას, მიიღეს თუ არა საქართველოს მხრიდან დასტური სამიტთან დაკავშირებით, უპასუხა, რომ საქართველოს მთავრობის განზრახვებთან დაკავშირებით ის ვერ ისაუბრებს:
„საქართველოს მთავრობის განზრახვასთან დაკავშირებით, მოგიწოდებთ მიმართოთ საქართველოს მთავრობას. ჩვენ მოვუწოდებთ „ქართული ოცნების“ მთავრობას, სწრაფად გადადგას ნაბიჯები საქართველოს ევროატლანტიკურ გზაზე დასაბრუნებლად, როგორც ეს მის ხალხს სურს და როგორც ეს კონსტიტუციაშია მითითებული“.
ნატოს სამიტი ვაშინგტონში 9-11 ივლისს გაიმართება. გუშინ, 27 ივნისს, პრემიერ-მინისტრმა ირაკლი კობახიძემ დაადასტურა, რომ სამიტზე საქართველო წარმოდგენილი იქნება, ხოლო ვინ გაემგზავრება აშშ-ში, მოგვიანებით დაზუსტდება.
ბოლო პერიოდში საქართველოსა და აშშ-ის შორის ურთიერთობები განსაკუთრებით დაიძაბა. მას შემდეგ, რაც „ქართული ოცნების“ ხელისუფლებამ პარტნიორების კრიტიკის მიუხედავად, ე.წ. „უცხოეთის აგენტების“ შესახებ რუსული კანონი მიიღო და საპროტესტო აქციები დაარბია, აშშ-მა ორმხრივი თანამშრომლობის ყოვლისმომცველი გადახედვა დაიწყო, რაც ფინანსური დახმარების გადახედვასაც გულისხმობს. ამასთან, სახელმწიფო დეპარტამენტმა სავიზო სანქციების პირველი ნაწილი გამოაცხადა. საუბარია ორ-სამ ათეულ ადამიანზე, მათ შორის „ქართული ოცნების“ წევრებზე, პარლამენტის დეპუტატებზე, სამართალდამცავი ორგანოების თანამშრომლებსა და კერძო პირებზე, რომლებსაც აშშ-ის ტერიტორიაზე შესვლა აეკრძალებათ. გავრცელებული ინფორმაციით, სანქცირებულთა შორის არიან „ქართული ოცნების“ დეპუტატი დიმიტრი სამხარაძე და შინაგან საქმეთა სამინისტროს განსაკუთრებულ დავალებათა დეპარტამენტის დირექტორი ზვიად ხარაზიშვილიც.
![საქართველოს ამბები](/images/a2.png#joomlaImage://local-images/a2.png?width=80&height=80)