Rusiya Federal Vergi Xidməti keçmiş “UFC” çempionu, dağıstanlı Xabib Nurmagomedovunn hesablarını müsadirə edib. Medianın məlumatına görə, buna səbəb dövlətə olan 300 milyon rubla yaxın borc olub.
Əsas xəbərlər
Nurmagomedov iyunun 30-da Almaniyanın Köln şəhərində olub, orada keçmiş portuqaliyalı futbolçu Luiş Fiqo ilə birgə Gürcüstan-İspaniya oyununu izləyib və oyundan sonra Gürcüstanın baş naziri İrakli Kobaxidze, Tbilisi meri Kaxa Kaladze və “Gürcü Arzusu”nun təsisçisi Bidzina İvanişvilinin oğlu Tsotne İvanişvili ilə görüşüb.
“Xabib Nurmagomedovun borcunun əsasını vergilərin və cərimələrin ödənilməməsi təşkil edib”, - Rusiya Federal Vergi Xidməti bildirib.
Nurmagomedov 2019-2021-ci illər ərzində xaricdən əldə etdiyi gəlirlərə görə vergi ödəməməkdə ittiham olunur. İdmançının özü hələlik bu məlumatı şərh etməyib.
İyunun sonunda Rusiya təhlükəsizlik orqanları Mahaçqalada Xabib Nurmagomedovun atasının yaratdığı döyüş sənəti məktəbinə daxil olub. Məlum olub ki, iyunun 23-də Dərbənd və Mahaçqalada hücumları təşkil edənlərdən biri olan MMA döyüşçüsü Qacimurad Kaqirov orada məşq edib. Nurmagomedov meneceri vasitəsilə Kaqirovun məktəbdə şagird olmadığını və təxminən bir aya yaxın orada sparrinq etdiyini açıqlayıb.
35 yaşlı Xabib Nurmagomedov ən məşhur UFC döyüşçülərindən biridir. O, karyerasını 2020-ci ilin sonunda mütləq çempion statusu ilə başa vurub. 2021-ci ildə Rusiyanın “Forbes” jurnalı onun illik gəlirini 12 milyon dollar olaraq qiymətləndirib.
