პარლამენტის თავმჯდომარე შალვა პაპუაშვილი გამოეხმაურა ევროკავშირის უმაღლესი წარმომადგენლის, ჯოზეფ ბორელის მორიგ განცხადებას, რომლის მიხედვითაც, რუსული კანონი ევროპულ ღირებულებებთან შეუსაბამოა და მისი ხელახლა ინიცირებით „ქართულმა ოცნებამ“ ნაკისრი ვალდებულება არ შეასრულა.
ახალი ამბები
მკითხველის რჩეული
- 1 ეს არის ღალატი, ამ კანონით ეს ქვეყანა თქვენ მიგყავთ რუსეთისკენ - ეთერ თურაძე შალვა პაპუაშვილს
- 2 სტიგმატიზება საბედისწერო შეიძლება იყოს ადამიანების სიცოცხლისთვის - ზენონი რუსულ კანონზე
- 3 ფიცს ვდებ, თუ კანონს არ გაიწვევენ, დავტოვებ პარტიას და თანამდებობას - „ოცნების“ წევრი თელავიდან
- 4 ქართველი ხალხის მომავალი სასწორზეა - 12 ქვეყნის საგარეო კომიტეტები რუსულ კანონზე
- 5 სასამართლომ ანტიკორუფციულ ბიუროს სანქცირებული მოსამართლეების ქონების შემოწმება აუკრძალა
- 6 83 დეპუტატი, რომელმაც რუსულ კანონს მხარი დაუჭირა | სია
პაპუაშვილმა ჟურნალისტებს განუცხადა, რომ რუსული კანონი „ქართველი ხალხის ინტერესიდან გამომდინარე კანონია“ და ის შეიძლება არ შედიოდეს „განსაკუთრებით მათ ინტერესებში, ვისი ფინანსებიც საქართველოში შემოდის გაუმჭვირვალედ“.
„სამწუხაროდ, ევროკავშირის დაფინანსებაც არის საქართველოში გაუმჭვირვალე. ჩვენ ვიცით მაგალითები - მაგალითად, ევროპის დემოკრატიის ფონდის, რომელიც მალავს თავის დაფინანსებას საქართველოში, რაც არის სწორედაც რომ ევროპული ღირებულებების საწინააღმდეგო“, - განაცხადა შალვა პაპუაშვილმა.
პარლამენტის თავმჯდომარის თქმით, არის მცდელობა, „ჩაიხშოს საღი აზრი“ და დისკუსია რუსულ კანონზე, რაც, მისივე შეფასებით, ანტიევროპული ქცევაა.
„დარწმუნებული ვარ, ბატონ ბორელს არც კი აქვს წაკითხული ეს კანონპროექტი, აბსოლუტურად დარწმუნებული ვარ“, - თქვა პაპუაშვილმა.
გუშინ, საგარეო პოლიტიკის და უსაფრთხოების საკითხებში ევროკავშირის უმაღლესმა წარმომადგენელმა, ჯოზეფ ბორელმა საქართველოს ხელისუფლება კიდევ ერთხელ გააკრიტიკა რუსული კანონის გამო და გაიმეორა, რომ ის შეუთავსებელია ევროკავშირის ღირებულებებთან.
17 აპრილს, რუსული კანონის პირველი მოსმენით მიღების შემდეგ, ჯოზეფ ბორელმა და ევროკომისარმა სამეზობლო პოლიტიკისა და გაფართოების საკითხებში, ოლივერ ვარჰეიმ ერთობლივი განცხადება გაავრცელეს, სადაც ნათქვამია, რომ „ამ კანონის საბოლოო მიღება უარყოფითად იმოქმედებს ევროკავშირის გზაზე საქართველოს პროგრესზე“. ბორელი და ვარჰეი მიიჩნევენ, რომ რუსული კანონი შეზღუდავს სამოქალაქო საზოგადოებისა და მედია ორგანიზაციების თავისუფლად მუშაობის შესაძლებლობებს, შეიძლება შეზღუდოს გამოხატვის თავისუფლება და უსამართლოდ მოხდეს იმ ორგანიზაციების სტიგმატიზება, რომლებსაც სარგებელი მოაქვთ საქართველოს მოქალაქეებისთვის.
„ქართული ოცნების“ რუსულ კანონს რუსეთშიც გამოეხმაურნენ, სადაც „უცხოური აგენტების“ კანონი 2012 წელს მიიღეს. დუმის თავმჯდომარემ, ვიაჩესლავ ვოლოდინმა განაცხადა, რომ „ნებისმიერი ქვეყანა, თუ მას სურს გახდეს სუვერენული სახელმწიფო, ვალდებულია მიიღოს" ეს კანონი. რუსეთის საგარეო საქმეთა მინისტრის, სერგეი ლავროვის შეფასებით, „ქართული ოცნების“ რუსული კანონი „ძალიან ლმობიერია“.
