„ოცნების“ საკანონმდებლო ინიციატივებს აშშ-ის სახელმწიფო მდივნის თანაშემწე გამოეხმაურა

„შეშფოთებული ვარ საქართველოს პარლამენტში წარდგენილი საკანონმდებლო ინიციატივებით, რომლებიც საქართველოს ევროპიდან ჩამოშორების საფრთხეს ქმნის. აშშ ყოველთვის აიმაღლებს ხმას ადამიანის უფლებების დასაცავად ყველასთვის, გამოხატვის თავისუფლებისა და მშვიდობიანი შეკრების თავისუფლების ჩათვლით“, - დაწერა ობრაიენმა სოციალურ ქსელ X-ში.

„ქართულმა ოცნებამ“ დააბრუნა ე.წ. უცხოეთის აგენტების შესახებ კანონპროექტი, რომელზეც უარი ერთი წლის წინ, საზოგადოების მასშტაბური პროტესტის შედეგად თქვა და პირობა დადო, რომ ის „უპირობოდ, ყოველგვარი დათქმის გარეშე“ გაიწვია პარლამენტიდან. კანონპროექტის ტექსტი იგივე დარჩა - მხოლოდ „უცხოური გავლენის აგენტი“ შეიცვალა ტერმინით „უცხოური ძალის ინტერესების გამტარებელი ორგანიზაცია“. მმართველი პარტია აპირებს, რუსული კანონი საგაზაფხულო სესიის დასრულებამდე მიიღოს, მიუხედავად იმისა, რომ ამან შესაძლოა საქართველოს ევროინტეგრაციის პროცესი დააზიანოს.

მარტის ბოლოს, „ქართულმა ოცნების“ ლიდერებმა წარმოადგინეს საკონსტიტუციო ცვლილებებიც, რომლის მიზანი, მათივე თქმით, „მომავალი თაობების ფსევდოლიბერალური პროპაგანდისგან“ დაცვაა. რეალურად კი, ცვლილებები კრძალავს აზრის ნებისმიერ საჯარო გამოხატვას ან საჯარო შეკრებას, რომელიც შეიძლება „ერთსქესიანთა ურთიერთობის პოპულარიზაციად“ ჩაითვალოს. მმართველი პარტიის ეს ინიციატივა ევროპის საბჭოს ადამიანის უფლებათა კომისარმა დუნია მიატოვიჩმა წინასაარჩევნოდ ლგბტი ფობიით მანიპულირებად და დისკრიმინაციად შეაფასა.