ჩეჩენმა ბლოგერმა ტუმსო აბდურახმანოვმა ვიდეო გამოაქვეყნა, სადაც ამბობს, რომ ცოცხალია

„მეგობრებო, ისევ ვაგრძელებ საქმიანობას ჩემს არხებზე. თვალი ადევნეთ განახლებულ ინფორმაციას, თვალი ადევნეთ მოვლენებს“, - ამბობს ის.

ჩეჩნეთის ლიდერის, რამზან კადიროვის და მისი გარემოცვის კრიტიკით ცნობილი ტუმსო აბდურახმანოვი სოციალურ ქსელებში ბოლოს 30 ნოემბერს გამოჩნდა. მისი მკვლელობის შესახებ ინფორმაცია 1-ელი დეკემბრიდან ვრცელდებოდა. 5 დეკემბერს, მოძრაობა „ადათმა“, რომელიც თავს ჩეჩნეთის დამოუკიდებლობისთვის მებრძოლ სახალხო მოძრაობას უწოდებს, Telegram-ში დაწერა: „როგორი რთულიც არ უნდა იყოს ჩვენთვის მომხდარის აღიარება, სამწუხაროდ, ჭორები ტუმსო აბდურახმანოვის სიკვდილის შესახებ სიმართლე აღმოჩნდა. რამდენიმე დღეა ჩვენ ვაწარმოებთ საკუთარ შიდა გამოძიებას ტუმსოს მკვლელობის საქმეზე. თავიდან ვერ ვიჯერებდით მომხდარს. ამ ეტაპზე მისი დაღუპვის დამადასტურებელი საკმარისი ინფორმაცია გვაქვს. მისი ძმა, მუჰამედი სპეცსამსახურებმა დამალეს. ტუმსოს ადამიანთა ჯგუფმა ღამით ესროლა. ამ წუთებში მკვლელობის დეტალებს იძიებენ“.

შვედეთის პოლიცია აბდურახმანოვის მკვლელობის შესახებ გავრცელებულ ინფორმაციას ვერ ადასტურებდა და არც დამატებით კომენტარს აკეთებდა.

ჩეჩნეთის რესპუბლიკა იჩქერიის დევნილობაში მყოფი მთავრობის ხელმძღვანელი ახმედ ზაკაევი მიიჩნევდა, რომ დევნილი ბლოგერი ცოცხალი იყო და შვედი სამართალდამცველების დაცვის ქვეშ იმყოფებოდა.

ტუმსო აბდურახმანოვი ჩეჩნეთიდან 2015 წელს გაიქცა, რასაც წინ უძღოდა კონფლიქტი ჩეჩნეთის მთავრობის ადმინისტრაციის მაშინდელ ხელმძღვანელთან ისლამ კადიროვთან. აბდურახმანოვი საქართველოში იმყოფებოდა და თავშესაფრის მიღებას აქ ცდილობდა, რაზეც უარი ეთქვა. 2017 წელს მან საქართველო დატოვა, რის შემდეგაც ჯერ პოლონეთში იყო, შემდეგ კი შვედეთში. ჩეჩნეთის ხელისუფლების წარმომადგენლები ტუმსო აბდურახმანოვს მოკვლით არაერთხელ დაემუქრნენ. 2020 წლის თებერვალში, შვედეთში, ბლოგერს საკუთარ ბინაში ჩაქუჩით რუსეთის მოქალაქე რუსლან მამაევი დაესხა თავს. 2021 წლის ოქტომბერში აბდურახმანოვმა შვედეთის ხელისუფლებისგან პოლიტიკური დევნილის სტატუსი მიიღო.