კონგრესმენები: ეს არჩევნები საქართველოს აშორებს ნატოსა და ევროკავშირში გაწევრიანებისგან

კონგრესმენების მიერ გავრცელებულ ერთობლივ განცხადებაში ნათქვამია, რომ არჩევნები დაზიანდა ხმების ყიდვის, ამომრჩეველთა დაშინების, ადმინისტრაციული რესურსების ბოროტად გამოყენებისა და არჩევნების სამეთვალყურეო საბჭოებში საეჭვო დანიშვნების შესახებ ცნობებით.

„26 ოქტომბრის არჩევნებმა საქართველოს მისცა ფასდაუდებელი შესაძლებლობა, დაემტკიცებინა საერთაშორისო თანამეგობრობისთვის, ნატოს ქვეყნებისა და ევროკავშირისთვის, რომ საქართველო მტკიცედ რჩება ევროატლანტიკური გზის ერთგული.

სამწუხაროდ, კამპანიის რიტორიკით, უკრაინის წინააღმდეგ რუსეთის აგრესიაში დასავლეთის დადანაშაულებით, სამოქალაქო საზოგადოების ამოსაძირკვად „უცხოური აგენტების“ კანონის მიღებით და ოპოზიციური პოლიტიკური ფიგურების წინააღმდეგ ძალადობრივ თავდასხმებზე პასუხისმგებლობის არარსებობით, საქართველოს მთავრობამ ეს ვერ დაამტკიცა.

ეს არჩევნები, რომელმაც მნიშვნელოვანი გამოწვევები შეუქმნა დემოკრატიულ პროცესს, მნიშვნელოვნად აშორებს საქართველოს ნატოსა და ევროკავშირში გაწევრიანებისგან“, - ვკითხულობთ განცხადებაში.

კონგრესმენები შიშობენ, რომ საქართველო განვითარებადი დემოკრატიიდან ავტოკრატიულ ქვეყნად გადაიქცევა: „ფართოდ გავრცელებული ზეწოლა საჯარო სექტორის თანამშრომლებზე, რათა ხმა მიეცათ მოქმედი პარტიისთვის და პოლიტიკურ ოპონენტებზე ძალადობრივი თავდასხმების გამოძიებაზე უარი არის ავტორიტარული ქცევა და მკვეთრი გადახვევა აქტიური, მრავალპარტიული განვითარებადი დემოკრატიიდან, რომელიც ოდესღაც განსაზღვრავდა საქართველოს.“

კონგრესმენები თანადგომას უცხადებენ პროდასავლელ ქართველ ხალხს, რომელიც ევროატლანტიკური მისწრაფებების ერთგული რჩება.