მარნეულის 69-ე უბნის მონაცემები გაბათილდა - ოპოზიციაში ამბობენ, რომ იქ არჩევნებს იგებდნენ

„გაუქმებულია ეს უბანი, იმიტომ, რომ სწორედ იქ იგებდა ოპოზიცია და კონკრეტულად, „ერთიანობა - ნაციონალრუი მოძრაობა“. ეს ძალიან კარგად იცოდნენ. ამის გამო, საკრებულოს თავმჯდომარის მოადგილემ, რომელიც ახლაც არ არის დაკავებული, ასე დემონსტრაციულად, ჩაიდინა სისხლის სამართლის დანაშაული.

მარნეული არ არის გამონაკლისი. ამ ტენდენციას ვხედავთ მთელი ქვეყნის მასშტაბით. იქ, სადაც ოპოზიცია იგებს, „ქართული ოცნების“ წარმომადგენლები ფიზიკურ დაპირისპირებაზე მიდიან იმისთვის, რომ უბნები გაუქმდეს“, - განაცხადა თინა ბოკუჩავამ.

მარნეულის 69-ე საარჩევნო უბანში უკანონო ქმედების ამსახველი ვიდეო „ჩემი ხმის“ დამკვირვებელმა გადაიღო, რის შემდეგაც, სადამკვირვებლო მისიის განცხადებით, მას ფიზიკურად გაუსწორდნენ და უბნიდან გააძევეს. ერთ-ერთი მამაკაცი, რომელმაც ყუთში ბიულეტენები ჩატენა, საკრებულოს თავმჯდომარის მოადგილე და „ქართული ოცნების“ წევრი როვშან ისკანდაროვია. ის 69-ე უბანში პარტიის წარმომადგენლის სტატუსით იმყოფებოდა.

შინაგან საქმეთა სამინისტრომ მომხდართან დაკავშირებით გამოძიება სისხლის სამართლის კოდექსის 164³ მუხლით დაიწყო, რაც არჩევნების გაყალბებას გულისხმობს. დანაშაული ორ წლამდე ვადით თავისუფლების აღკვეთით ისჯება.

მმართველი პარტიის აღმასრულებელმა მდივანმა, მამუკა მდინარაძემ ბიულეტენების ჩაყრას „დადგმული სპექტაკლი“ და „პროვოკაცია“ უწოდა.