მარნეულის 69-ე საარჩევნო უბანში ყუთში ბიულეტენების უკანონო ჩაყრის შემთხვევა დაფიქსირდა, რის შემდეგაც კენჭისყრა შეჩერდა. ერთ-ერთი მამაკაცი, რომელიც გავრცელებული ვიდეოს მიხედვით, ყუთში ბიულეტენებს ტენის, საკრებულოს თავმჯდომარის მოადგილე და „ქართული ოცნების“ წევრი როვშან ისკანდაროვია. ის 69-ე უბანში პარტიის წარმომადგენლის სტატუსით იმყოფებოდა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
უკანონო ქმედების ამსახველი ვიდეო სადამკვირვებლო მისია „ჩემი ხმის“ დამკვირვებელმა გადაიღო, რის შემდეგაც მას ფიზიკურად გაუსწორდნენ და უბნიდან გააძევეს.
ცენტრალური საარჩევნო კომისიის თავმჯდომარე გიორგი კალანდარიშვილმა გავრცელებულ ინფორმაციას „შემაშფოთებელი“ უწოდა და მარნეულის საოლქო საარჩევნო კომისიას „სათანადო გადაწყვეტილების“ მიღებისკენ მოუწოდა.
„ინტერნეტსივრცეში ინფორმაცია იმის თაობაზე, რომ მარნეულის 69-ე საარჩევნო უბანზე განხორციელდა, თითქოს, საარჩევნო ბიულეტენების ჩაყრა საარჩევნო ყუთში. ეს არის შემაშფოთებელი ინფორმაცია.
საარჩევნო ადმინისტრაცია არ დაუშვებს ამ ინფორმაციის დადასტურების შემთხვევაში, იმის შესაძლებლობას, რომ ასეთმა იზოლირებულმა, მართულმა თუ მანიპულაციურმა შემთხვევებმა დააზიანოს ის მრვალთვიანი ძალისხმევა, რომელიც ჩვენ კენჭისყრის დღესთან მიმართებაში ჩავდეთ 24 საათის განმავლობაში.
მე მინდა სასწრაფო წესით მოვუწოდო და მოვთხოვო მარნეულის საოლქო საარჩევნო კომისიას, გაერკვეს სიტუაციაში, მოიწვიოს კომისიის სხდომა და მიიღოს სათანადო გადაწყვეტილება“, - განაცხადა კალანდარიშვილმა.
შინაგან საქმეთა სამინისტრომ მომხდართან დაკავშირებით გამოძიება სისხლის სამართლის კოდექსის 1643 მუხლით დაიწყო, რაც არჩევნების გაყალბებას გულისხმობს. დანაშაული ორ წლამდე ვადით თავისუფლების აღკვეთით ისჯება.
„მინდა ვთხოვო სამინისტროს, რომ რაც შეიძლება სწრაფ ტემპში განხორციელდეს შესაბამისი პროცედურები, რათა საზოგადოებას, ჩვენ ჩვენი კომპეტანციის ფარგლებში მივაწოდოთ ობიექტური, დაზუსტებული ინფორმაცია ამ საკითხთან დაკავშირებით. ყველა ასეთი შემთხვევა შეესაბამება თუ არა სინამდვილეს რა თქმა უნდა აზიანებს საარჩევნო გარემოს, აზიანებს კენჭისყრის დღის მთლიანობას და აზიანებს ინსტიტუციის რეპუტაციას“, - თქვა გიორგი კალანდარიშვილმა.
საპარლამენტო არჩევნები 2263 უბანზე ელექტრონული ტექნოლოგიების გამოყენებით ტარდება, ხოლო დანარჩენ 781 უბანზე - ძველი წესით.
