ოკუპირებული ცხინვალის დე ფაქტო სასამართლომ 8-თვიანი პატიმრობა მიუსაჯა სოფელ გუგუტიანთკარში მცხოვრებ რამაზ ბეღელურს, რომელიც რუსეთის საოკუპაციო ძალების წარმომადგენლებმა აპრილის ბოლოს გაიტაცეს და ე.წ. საზღვრის დარღვევის ბრალდება წაუყენეს.
ახალი ამბები
მკითხველის რჩეული
- 1 „ამომრჩევლის ირიბი მოსყიდვაა“ - პრეზიდენტმა ამნისტიის კანონს ხელი მოაწერა
- 2 ილიას სახელმწიფო უნივერსიტეტს ავტორიზაცია ერთი წლის თავზე მონიტორინგის პირობით მიანიჭეს
- 3 მოვუწოდებთ საერთაშორისო მისიებს, 26 ორგანიზაციის ინფორმაცია არ გაითვალისწინონ - მიქანაძე
- 4 „ოკუპაციაზე ხომ ვისაუბრე?!“ - კობახიძე კითხვაზე, რატომ არ ახსენა გაეროში რუსეთი
- 5 სასამართლომ გორში დაკავებული ბიზნესმენი იოსებ ბაბაევი სამართალდამრღვევად ცნო
- 6 სოხუმის დაცემიდან 31 წელი გავიდა
რამაზ ბეღელურისთვის პატიმრობის მისჯის შესახებ მის დედას, ნორა ბეღელურს საქართველოს სახელმწიფო უსაფრთხოების სამსახურიდან აცნობეს.
„ბევრი ვიმუშავეთ ამ საკითხზე და ჯერ კიდევ ვიმუშავებთ, რომ იქნებ დროულად მოხდეს მისი გათავისუფლებაო. ავად არის [რამაზ ბეღელური], ყოველდღიური წამლების ქვეშ არის. წამალი რომ არ დალიოს, კრუნჩხვაში ჩავარდება“, - უთხრა „მთავარ არხს“ ნორა ბეღელურმა.
40 წლის რამაზ ბეღელური საოკუპაციო ძალების უკანონო პატიმრობაში მეხუთედ იმყოფება. მისი ბოლო დაკავება აპრილის ბოლოს, აღდგომის ბრწყინვალე დღესასწაულის წინა დღეებში მოხდა. საქართველოს სახელმწიფო უსაფრთხოების სამსახურმა 29 აპრილს განაცხადა, რომ საქართველოს მოქალაქე უკანონოდ ოკუპირებულ სოფელ დისევის მიმდებარე ტერიტორიაზე დააკავეს. ოჯახისა და თანასოფლელების ინფორმაციით კი, რამაზ ბეღელური იმ დროს დაიჭირეს, როდესაც სოფლის სასაფლაოზე იყო და ძმის საფლავს ასუფთავებდა.
რამაზ ბეღელური საოკუპაციო რეჟიმმა 2021 წლის 2 თებერვალსაც დააკავა. 31 მარტს, ცხინვალის სასმართლომ ის ე.წ. საზღვრის დამრღვევად სცნო და ერთწლიანი პირობითი პატიმრობა მიუსაჯა. საქართველოს მოქალაქე 2-თვიანი უკანონო პატიმრობის შემდეგ, 1-ელ აპრილს გაათავისუფლეს და საქართველოს ცენტრალური ხელისუფლების წარმომადგენლებს გადასცეს. ოჯახის წევრების ინფორმაციით, გათავისუფლებიდან ერთი თვე არ იყო გასული, როდესაც რამაზ ბეღელური კომაში ჩავარდა და ეპილეფსიის დიაგნოზი დაუსვეს.
ამჟამად ცხინვალის რეჟიმის უკანონო პატიმრობაში საქართველოს 8 მოქალაქე რჩება. 5 ივნისს რუსულ მედიაში გავრცელდა ინფორმაცია, რომ ე.წ. სასამართლომ 35 წლის გიორგი მოსიაშვილი დამნაშავედ ცნო „საზღვრის“ უკანონო კვეთაში და მას ორი წლით თავისუფლების აღვეთა მიუსაჯა. გიორგი მოსიაშვილი საჩხერის სოფელ პერევის მცხოვრებია. ის 2023 წლის 31 ოქტომბერს ოკუპირებულ სოფელ სინაგურის მიმდებარე ტერიტორიიდან გაიტაცეს.
