პარლამენტის შესასვლელები პოლიციამ დაიკავა, დემონსტრანტები ძალის გამოყენებით დააკავეს

პარლამენტთან რუსული კანონის წინააღმდეგ მშვიდობიანი აქცია 12 მაისის 22:00 საათიდან მიმდინარეობის. ათასობით მოქალაქემ ღამე ქუჩაში გაათენა.

შინაგან საქმეთა სამინისტრომ თავისუფლების მოედნიდან რუსთაველის გამზირის მიმართულებით ე.წ. რობოკოპები და წყლის ჭავლის მანქანები განალაგა. სამინისტრომ გამთენიისას აქციის ორგანიზატორებსა და მონაწილეებს მოუწოდა, გაეთავისუფლებინათ საკანონმდებლო ორგანოს შესასვლელები, დეპუტატებისა და აპარატის თანამშრომლებისთვის მიეცათ პარლამენტის შენობაში შესვლისა და სადეპუტატო უფლებამოსილების განხორციელების საშუალება. წინააღმდეგ შემთხვევაში, შსს-ს განცხადებით, პოლიცია იმოქმედებდა კანონით გათვალისწინებული უფლებამოსილების ფარგლებში და უზრუნველყოფდა პარლამენტის შესასვლელების საპოლიციო ძალებით გათავისუფლებას.

„ქართული ოცნება“ ე.წ. „უცხოეთის აგენტების“ შესახებ რუსული კანონის მესამე, საბოლოო მოსმენით მიღებას დღეს და ხვალ აპირებს. ორშაბათს მას იურიდიულ საკითხთა კომიტეტის სხდომაზე განიხილავენ და დაუჭერენ მხარს, სამშაბათს კი კანონის პლენარულ სესიაზე გატანაა დაგეგმილი.

12 მაისს, შინაგან საქმეთა მინისტრმა, ვახტანგ გომელაურმა მოქალაქეები გააფრთხილა, რომ კანონის სრული სიმკაცრით და დაისჯება ყველა, ვინც პარლამენტის შენობის ბლოკირებას შეეცდება. პრემიერ-მინისტრმა ირაკლი კობახიძემ პოლიციას მიმართა, დაგეგმილ აქციებზე „ევროპულზე მაღალი სტანდარტით“ იმოქმედონ.