პროკურატურა ალექსანდრე ელისაშვილს ტერორისტული აქტის ჩადენის მცდელობას ედავება

პროკურატურა აცხადებს, რომ 29 ნოემბერს, დაახლოებით 04:00 საათზე, ცეცხლსასროლი იარაღით, საბრძოლო მასალით და ტერორისტული აქტის განხორციელებისათვის საჭირო ნივთებით შეიარაღებული, ნიღბიანი ალექსანდრე ელისაშვილი მივიდა თბილისის საქალაქო სასამართლოს შენობასთან, ჩაქუჩის გამოყენებით ჩაამსხვრია სასამართლოს კანცელარიის შენობის გარე ფასადის მინა და შეაღწია სასამართლოს შიდა სივრცეში.

საქმეში დევს პროკურატურის მიერ გავრცელებული ვიდეო კადრები, რომელიც ასახავს ქუჩაში ნიღბიანი პირის გადაადგილებასა და სასამართლოს კანცელარიაში განვითარებულ მოვლენებს. როგორ შეაღწია მან შენობაში, ვიდეოში არ ჩანს.

პროკურატურის განცხადებით, შენობაში უკანონო შეღწევის შემდეგ, შიდა სივრცის სხვადასხვა ნაწილში, მათ შორის ადგილზე განთავსებულ ნივთებზე და დოკუმენტაციაზე ალექსანდრე ელისაშვილმა დაასხა დიდი რაოდენობით აალებადი ნივთიერება და ცეცხლის წაკიდებით სცადა ხანძრის გაჩენა. პროკურატურის განმარტებით, ამ დროს მას მანდატურის სამსახურის თანამშრომლებმა მიუსწრეს.

„ერთ-ერთი მანდატურის დანახვისთანავე, ალექსანდრე ელისაშვილი თავს დაესხა მას და დაუწყო ცემა. დაკავების პროცესში, მანდატურის სამსახურის სამი თანამშრომელი ცდილობდა ალექსანდრე ელისაშვილის განეიტრალებას, მისთვის აალებად ნივთიერებაზე ცეცხლის წაკიდების საშუალების მოსპობას და განიარაღებას. თავდამსხმელი, თავის მხრივ, ცდილობდა ცეცხლსასროლი იარაღის ამოღებას და გამოყენებას.

ალექსანდრე ელისაშვილმა დაახლოებით 5-6 წუთის განმავლობაში მანდატურის სამსახურის თანამშრომლებს აქტიური წინააღმდეგობა გაუწია, რომლის დაძლევის შემდეგ შესაძლებელი გახდა მისი საბოლოო განეიტრალება და დაკავება“, - ნათქვამია პროკურატურის განცხადებაში.

ელისაშვილს ბრალდება სისხლის სამართლის კოდექსის 19-323-ე მუხლის პირველი ნაწილით წარედგინა, რაც ტერორისტული აქტის ჩადენის მცდელობას გულისხმობს და სასჯელის სახედ და ზომად 10-დან 15 წლამდე თავისუფლების აღკვეთას ითვალისწინებს. პროკურატურა ბრალდებულისთვის აღკვეთის ღონისძიების სახით პატიმრობის შეფარდებას ითხოვს.

ადვოკატ გიორგი რეხვიაშვილის თქმით, ალექსანდრე ელისაშვილი აღიარებს ქმედებას, მაგრამ არა წარდგენილ ბრალს.

„ის თვლის, რომ ჩაიდინა რაღაც ქმედებები, რომლებიც არ წარმოადგენს დანაშაულს, ეს არის მისი მხოლოდ და მხოლოდ პროტესტის გამოხატვის ფორმა. ის უსამართლო სასამართლოს მიმართ იყო მიძღვნილი და ზოგადად, ეს იყო სოლიდარობა პოლიტპატიმრების მიმართ. აქედან გამომდინარე, წარდგენილი მუხლი არის აბსურდული.

რამდენი ადამიანი გახსენდებათ, პოლიტიკოსი ან ადამიანი, რომელსაც ტერორიზმის მუხლს წაუყენებენ?! მით უმეტეს, ქმედება არ არის განხორციელებული და სისრულეში მოყვანილი.

ალექსანდრე ელისაშვილი ქმედებას აღიარებს, თუმცა ის არ თვლის, რომ მისი ქმედება იყო დანაშაულის შემცველი. რაც შეეხება ტერორიზმს, ეს არის აბსურდული. მანამდე იყო დაწყებული 187-ე მუხლის მეორე ნაწილის „ა“ ქვეპუნქტით, რომელიც ითვალისწინებდა 3-დან 6 წლამდე პატიმრობას. თუმცა, როგორც ჩანს, არ ეყოთ სანქცია და გადაუკვალიფიცირეს ტერორიზმის მუხლით. ალექსანდრე ელისაშვილს აცხადებენ ტერორისტად“, - განაცხადა ადვოკატმა.

ელისაშვილს გუშინვე გაემიჯნა კოალიცია „ძლიერი საქართველო - ლელო“, რომელმაც მის ქმედებებს „მიუღებელი“ და „გაუმართლებელი“ უწოდა.

ალექსანდრე ელისაშვილი კიდევ ერთ სისხლის სამართლის საქმეზეა ბრალდებული – პროკურატურა მას „ქართული ოცნების“ ერთ-ერთ დამფუძნებელის ალი ბაბაევის მიმართ პოლიტიკური ნიშნით დევნას ედავება. აღნიშნულ საქმეზე მას აღკვეთის ღონისძიების სახით გირაო აქვს შეფარდებული, გამამტყუნებელი განაჩენის შემთხვევაში, კი 3 წლამდე პატიმრობა ემუქრება.

2024 წლის 15 აპრილს, როცა ალექსანდრე ელისაშვილი პარლამენტის დეპუტატი იყო, იურიდიულ საკითხთა კომიტეტის სხდომაზე „აგენტების კანონის“ განხილვისას, საპარლამენტო უმრავლესობის ლიდერს, მამუკა მდინარაძეს სახეში მუშტი ჩაარტყა. „ამას საკადრისი პასუხი გაეცემა. მე ახლა მუქარაზე არ გადავდივარ ქუჩური მეთოდებით. საკადრის პასუხს გავცემთ“, - თქვა მამუკა მდინარაძემ ინციდენტის შემდეგ. ამჟამად მამუკა მდინარაძე „ქართული ოცნების“ ხელისუფლებაში სახელმწიფო უსაფრთხოების სამსახურის უფროსია.

ამ თემაზე:

რუსეთმა ალეკო ელისაშვილს 6-წლიანი პატიმრობა დაუსწრებლად მიუსაჯა