ყვარელში ბიუჯეტის დაფინანსებით რუსული ენის შემსწავლელი პროგრამა გაუქმდა

ადგილობრივმა ხელისუფლებამ ყვარლის კულტურის განვითარების ცენტრში, სკოლის მოსწავლეებისთვის რუსული ენის შემსწავლელი უფასო კურსი წელს გახსნა და მიზეზად „მრავალრიცხოვანი მოსახლეობის“ თხოვნა დაასახელა.

„თუ თქვენ მიგაჩნიათ, რომ რუსეთი მტერია, ბავშვებმა მტრის ენა უნდა იცოდნენ, რომ გააგებინონ, როგორი მაგარია საქართველო“, - უთხრა „საქართველოს ამბებს“ ცენტრის დირექტორმა 23 მარტს. მაია ზარდიაშვილის თქმით, პროექტის „გაიღრმავე ცოდნის“ ფარგლებში რუსული ენის კურსის დამატების გადაწყვეტილება მუნიციპალიტეტის მერთან, გივი ზაუტაშვილთან იყო შეთანხმებული.

საჯარო სკოლებში რუსული ენა არჩევით საგნად მეხუთე კლასიდან ისწავლება.

„რა არის, რა აჟიოტაჟი ატყდა? რასაც სკოლაში 45 წუთში ვერ იგებენ, იმის გაგებაში ვეხმარებით, რომ საგანი ნორმალურად ისწავლონ. შეიძლება რუსეთი ჩვენი მტერი იყოს, მაგრამ რუსული არ არის. ჩვენ ვებრძვით რუსეთს, მაგრამ ენას არ უნდა ვებრძოლოთ, კულტურას არ უნდა ვებრძოლოთ, მწერლობას არ უნდა ვებრძოლოთ. მგონი, ყველა ნორმალური ადამიანი ასე აზროვნებს. უფროსებმაც მოითხოვეს, რომ რუსული ენის კურსები მათთვისაც გაგვეხსნა. მე გავხსნი სახლში და ვერავინ შემედავება“, - ამბობს რუსული ენის პედაგოგი მაია ხვთისაურიშვილი.

ყვარლის კულტურის განვითარების ცენტრმა რუსული ენის შემსწავლელ კურსზე 7-დან 16 წლამდე ასაკის ბავშვების მიღება 20 თებერვალს დაიწყო. აღნიშნული განცხადება ცენტრის ფეისბუკგვერდზე ამ დროისთვის აღარ იძებნება. ოცი მსმენელისგან ორი ჯგუფი შეიქმნა და მეცადინეობაც დაიწყო. ცენტრის ხელმძღვანელის თქმით, მსურველი სამოცამდე ბავშვი იყო, თუმცა, არასაკმარისი რესურსების გამო, ოცზე მეტის მიღება არ შეეძლოთ.

„ქართული ოცნებიდან“ ყვარლის მუნიციპალიტეტის მერი გივი ზაუტაშვილი მედიას რამდენიმე დღეა ემალება და განმარტებას არ აკეთებს.