სალომე ზურაბიშვილი მიუნხენის კონფერენციამდე მედიის წარმომადგენლებს შეხვდა

„ეს შეხვედრები, რაც მე დავიწყე, ერთი მხრივ, მიმართულია იმისკენ, რომ მიუნხენში რომ წავალ, მხოლოდ მე კი არ წავიდე როგორც საქართველოს პრეზიდენტი, არამედ ჩემთან ერთად წამოვიდეს საზოგადოება და მისი პრობლემები - ყველა კუთხით, რაც დღეს ამ ქვეყანაში არსებობს. ამავე დროს, ჩემი სურვილია და ეს არის ის, რაც ახლა დავიწყეთ, რომ პრეზიდენტის და მისი ადმინისტრაციის ირგვლივ, რომელიც არის შემცირებული,  შემჭიდროვებული, შედგეს სხვადასხვა სეგმენტის პლატფორმები, რომლებიც იმუშავებენ ჩვენთან ერთად.

დღეს შევხვდი მედიამენეჯერებს და ეს იყო ძალიან მნიშვნელოვანი შეხვედრა რომ ჩვენ ერთად ვნახოთ, რა შეიძლბა გაკეთდეს იმისთვის, რომ გაძლიერდეს ქართული მედია იმ მდგომარეობაში და იმ მომენტში, როცა არის მასზე ძალიან დიდი წნეხი. ყველა დიქტატურული რეჟიმის, რომელიც გამყარებას ცდილობს, სამიზე არის ორი - საზოგადოება და მედია“, - განაცხადა ზურაბიშვილმა.

სალომე ზურაბიშვილმა აღნიშნა, რომ მედიის გზავნილებს წაიღებს მიუნხენის უსაფრთხოების კონფერენციაზე, რომელიც 14-16 თებერვალს გაიმართება.

„მზია ამაღლობელი იქნება ერთ-ერთი მთავარი თემა, რადგან ის გახდა სიმბოლო ამ სიტყვის თავისუფლების, ამ წნეხის, რომელიც, პირველ რიგში, რეგიონულ მედიაზე ვრცელდება იმიტომ, რომ, ალბათ, ეს რუსული რეჟიმი თვლის, რომ რეგიონული მედია უფრო სუსტია და იქ შეიძლება უფრო დაამყაროს თავისი გავლენა.

ეს ასე არ იქნება. ჩვენ ერთად ვიქნებით და მე, როგორც შევძლებ და სადაც შევძლებ, ყველას დავიცავ“, - უთხრა სალომე ზურაბიშვილმა ჟურნალისტებს.

შეხვედრას ესწრებოდნენ ტელეკომპანიების - „მთავარი არხის“, „ტვ პირველის“, „კავკასიის“ და „ფორმულას“ მენეჯერები, ონლაინგამოცემების - „პუბლიკის“, „ბათუმელების“, „ნეტგაზეთის“, „ტაბულას“, „სტუდია მონიტორის“, „პალიტრა მედიის“, „კახეთის ხმის“, რადიო „მარნეულის“ და „რეგიონულ მაუწყებელთა ალიანსის“ წარმომადგენლები. შეხვედრაზე ასევე იმყოფებოდა საზოგადოებრივი მაუწყებლის „პირველი არხის“ თანამშრომელი და „მოამბის“ ყოფილი წამყვანი ვასილ ივანოვ-ჩიქოვანი.

„ვსაუბრობდით იმ პრობლემების შესახებ, რომლებიც გვაქვს. რა თქმა უბნდა, პირველ რიგში, ეს არის მზია ამაღლობელი, რომელიც, მიგვაჩნია, რომ ძალიან არასწორი მუხლით უკანონოდ არის დაკავებული და სჯიან როგორც კრიტიკული მედიის წარმომადგენელს“, - განაცხადა „სტუდია მონიტორის“ დამფუძნებელმა, ნინო ზურიაშვილმა.

„ბათუმელების“ მთავარი რედაქტორის, ეთერ თურაძის თქმით, საუბარი შეეხო „ქართული ოცნების“ მიერ დაანონსებულ ახალ კანონსაც, რომელიც მედიის კიდევ უფრო შეზღუდვას ისახავს მიზნად.

„ამ მხრივაც გვჭირდება საერთაშორისო საზოგადოების დახმარება. ზოგადად, ვისაუბრეთ იმაზე, რომ ჩვენი, როგორც ჟურნალისტების სიცოცხლე და უსაფრთხოება უნდა იყოს დაცული ამ ქვეყანაში იმიტომ, რომ ვართ სამიზნეები და ეს განსაკუთრებით ბოლო პერიოდში გამოიკვეთა, როდესაც ადამიანებს თავს დაესხნენ და ალბათ, ბედისწერა იყო, რომ ჟურნალისტები გადარჩნენ.

ის, რომ მზია ამაღლობელი ციხეშია, არის მართლაც წარმოუდგენელი მესიჯი ჩვენთვის, ყველა ჟურნალისტისთვის. ჩვენი, ყველას ბედი შეიძლება ეს იყოს“, - აღნიშნა ეთერ თურაძემ.

როგორც ტელეკომპანია „ფორმულას“ დირექტორმა, ზურაბ გუმბარიძემ თქვა, დღეს ქართული მედია უკიდურესად მძიმე მდგომარეობაშია და „იმ განცხადებების ფონზე, როდესაც ჩვენი პარტნიორები გვპირდებიან ფინანსურ დახმარებას, თანხების გადმომისამართებას სამოქალაქო საზოგადოებისა და მედიის მიმართულებით, ძალიან მნიშვნელოვანია პრეზიდენტის როლი“.