სენატორი შაჰინი და კონგრესმენი ტერნერი დღეს საქართველოს ეწვევიან

„სენატორი ჯინ შაჰინი და კონგრესმენი მაიკ ტერნერი დღეს საქართველოს ოფიციალური ვიზიტით ეწვევიან. მოხარული ვართ, რომ ვუმასპინძლოთ მათ. ორპარტიული ვიზიტის ფარგლებში ისინი შეხვდებიან საქართველოს მთავრობის, სამოქალაქო საზოგადოების, კერძო სექტორისა და პოლიტიკური პარტიების წარმომადგენლებს. ასევე, სენატორი და კონგრესმენი გაეცნობიან აშშ-ის მთავრობის პროგრამებს, რომელიც მხარს უჭერს იძულებით გადაადგილებულ პირებს, მეწარმეებსა და სტუდენტებს. შეერთებული შტატები რჩება სრულად ჩართული და ერთგული საქართველოს ხალხისა და მათი ევროატლანტიკური მისწრაფებების მხარდაჭერაში“, - ვკითხულობთ საელჩოს განცხადებაში.

ჯინ შაჰინისა და მაიკ ტერნერის ვიზიტს წინ უძღვის პრეზიდენტ ჯო ბაიდენის მიერ პრეზიდენტ სალომე ზურაბიშვილისთვის გაგზავნილი წერილი, სადაც ის  „საქართველოს მთავრობის ანტიდემოკრატიული ქმედებების გამო“ იმედგაცრუებას გამოხატავს. ბაიდენი ანტიდემოკრატიული ქმედებების მაგალითად კრემლის სტილის „უცხოური აგენტების“ კანონს და საქართველოს მთავრობის ოფიციალური პირების ცრუ განცხადებებს ასახელებს.