ცხინვალიდან უკანონოდ დაკავებული რამაზ ბეღელური გაათავისუფლეს

რუსეთის საოკუპაციო ძალების წარმომადგენლებმა 40 წლის რამაზ ბერელური აპრილის ბოლოს, ე.წ. სახელმწიფო საზღვრის უკანონო გადაკვეთის ბრალდებით დააკავეს. ოჯახის ინფორმაციით, მისი დაკავება იმ დროს მოხდა, როდესაც სასაფლაოზე იყო და ძმის საფლავს ასუფთავებდა. ივლისში ცნობილი გახდა, რომ მას 8-თვიანი პატიმრობა მიუსაჯეს.

„4 ოქტომბერს, სასჯელის ვადის გასვლის გამო, იგი გათავისუფლდა და დადგენილი წესით ქართულ მხარეს გადაეცა“, - განაცხადა დე ფაქტო ხელისუფლებამ.

ბეღელურის გათავისუფლების შესახებ ინფორმაცია ცენტრალურმა ხელისუფლებამაც გაავრცელა. საქართველოს სახელმწიფო უსაფრთხოების სამსახურის ცნობით, პროცესში აქტიურად გამოიყენებოდა როგორც საქართველოში ევროკავშირის მონიტორინგის მისიის (EUMM) უშუალო ჩართულობით მოქმედი „ცხელი ხაზის“ მექანიზმი, ისე ცენტრალური ხელისუფლების ხელთ არსებული ყველა რელევანტური ინსტრუმენტი. საკითხი განიხილებოდა ინციდენტების პრევენციისა და მათზე რეაგირების მექანიზმის (IPRM) შეხვედრებზე და ჟენევის საერთაშორისო დისკუსიებზე.

„ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად“, - ნათქვამია სუს-ის მიერ გავრცელებულ განცხადებაში.

ოკუპირებულ ცხინვალში უკანონო პატიმრობაში საქართველოს ათი მოქალაქე რჩება.

ამ თემაზე:

„სასაზღვრო ნიშნის“ დაზიანებისას დაკავებულებს ცხინვალში 5 წლამდე პატიმრობა ემუქრებათ