რუსეთის სამხედრო სასამართლომ უკრაინაში მებრძოლი „ქართული ეროვნული ლეგიონი“ ტერორისტულ ორგანიზაციად ცნო. უშიშროების ფედერალურმა სამსახურმა (FSB) განაცხადა, რომ ლეგიონი 2014 წელს „უკრაინის თავდაცვის სამინისტროს მთავარი სადაზვერვო სამმართველოს პატრონაჟით“ შეიქმნა და „ეროვნული ნიშნის“ საფუძველზე დაკომპლექტებული ყველაზე დიდი შეიარაღებული ფორმირებაა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„ლეგიონის წევრები მონაწილეობენ საომარ მოქმედებებში უკრაინის შეიარაღებული ძალების მხარეს, ასევე მონაწილეობენ დივერსიისა და ტერორისტული თავდასხმების ორგანიზებაში რუსეთის ტერიტორიაზე, სამხედრო პერსონალის წამებასა და მშვიდობიანი მოსახლეობის მკვლელობაში“, - ნათქვამია FSB-ს განცხადებაში.
უშიშროების ფედერალური სამსახური აღნიშნავს, რომ ამიერიდან ლეგიონის წევრების „დანაშაულებრივი ქმედებების კვალიფიკაცია“ შესაძლებელი იქნება ტერორისტული დანაშაულის მუხლებითაც.
„ქართული ლეგიონი“ 2014 წელს შეიქმნა, როგორც მოხალისეთა ბატალიონი, 2016 წლიდან კი უკრაინის შეიარაღებული ძალების ნაწილი გახდა. მას მამუკა მამულაშვილი ხელმძღვანელობს.
რუსეთს მამუკა მამულაშვილზე საერთაშორისო ძებნა აქვს გამოცხადებული. საგამოძიებო კომიტეტი მას უკრაინის ტერიტორიაზე შეიარაღებული ფორმირების შექმნასა და ხელმძღვანელობას, „ქართული ლეგიონის“ და სხვა უკრაინული შეიარაღებული ფორმირებების საქმიანობაში საქართველოს სულ მცირე 24 მოქალაქის ჩართვას, ასევე, სიძულვილის გაღვივებას ედავება. თებერვლის ბოლოს, მოსკოვის სასამართლომ მამუკა მამულაშვილს აღკვეთის ღონისძიების სახით პატიმრობა დაუსწრებლად შეუფარდა. რუსეთს ძებნა აქვს გამოცხადებული „ქართული ლეგიონის“ სხვა წევრებზეც.
გუშინ, 13 ივნისს, მამუკა მამულაშვილმა განაცხადა, რომ რამდენიმე თვის წინ მესამედ მოწამლეს, რაზეც უკრაინის სამართალდამცავ ორგანოებს გამოძიება აქვთ დაწყებული.
„თუმცა, ალბათ, საკმაოდ რთული იქნება გარკვევა, ვინ გააკეთა ეს. შემიძლია გითხრათ, რომ „ქართულ ლეგიონში“ რუსეთის დავალებით არაერთი ქართველი იგზავნება როგორც რეკრუტი და დიდი ალბათობით, შეიძლება მოხდა მათი ხელით. არ გამოვრიცხავ, რომ საქართველოს მთავრობა, რომელიც დღეს რუსეთთან თანამშრომლობს, აგზავნიდეს ადამიანებს, ვისაც ევალებათ ასეთი რაღაცის შესრულება“, - განაცხადა მამულაშვილმა.
2023 წლის შემოდგომაზე, საქართველოს სახელმწიფო უსაფრთხოების სამსახური მამუკა მამულაშვილს ასახელდებდა იმ პირებს შორის, რომლებსაც, თითქოს, საქართველოში დესტაბილიზაციისა და სამოქალაქო არეულობის მოწყობა ჰქონდათ დაგეგმილი. სუს-ს ამის დამდასტურებელი არცერთი მტკიცებულება არ წარმოუდგენია.
