უნგრეთი მზად არის, ევროკავშირის მიერ უკრაინისთვის 50 მილიარდი ევროს გამოყოფის საკითხს ვეტო მოხსნას, თუ ევროკავშირი თავის ფონდებში უნგრეთისთვის დაბლოკილ დაახლოებით 30 მილიარდ ევროს განბლოკავს. ამის შესახებ ვიქტორ ორბანის მთავარმა პოლიტიკურმა მრჩეველმა, ბალაშ ორბანმა განაცხადა.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 სოზარ სუბარი პოლიციელების ხელფასების 20%-ით გაზრდას ითხოვს
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 6 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
ბალაშ ორბანმა გამოცემა Bloomberg-თან ეს განცხადება გააკეთა იმ დროს, როდესაც ცნობილი გახდა, რომ ევროკავშირი სავარაუდოდ დასთანხმდება 10 მილიარდი ევროს განბლოკვას უნგრეთში სასამართლოს დამოუკიდებლობის განმტკიცების შესახებ კანონების მიღების შემდეგ. თუმცა, უნგრეთი სრულ თანხას ითხოვს.
ევროკავშირმა უნგრეთს 30 მილიარდი ევრო ჯერ კიდევ 2022 წელს გაუყინა, ქვეყანაში კანონის უზენაესობის და კორუფციის პრობლემების გამო.
ბალაშ ორბანის თქმით, უნგრეთის დაფინანსება და უკრაინის დაფინანსება ორი სხვადასხვა რამ არის. ამასთნ, მან დაამატა, რომ თუ ბრიუსელი დაჟინებით მოითხოვს, უკრაინის დაფინანსება ევროკავშირის განახლებული ბიუჯეტიდან გამოიყოს, მაშინ ეს ორი საკითხი ერთმანეთთან დაკავშირებული ხდება.
ივნისში ევროკომისია გამოვიდა ინიციატივით, უკრაინისთვის სპეციალური მექანიზმი შეიქმნას, რომელიც 2027 წლამდე 50 მილიარდ ევრომდე გრანტებსა და სესხებს გასცემს. უნგრეთმა ინიციატივას ვეტო დაადო და ევროკავშირის წევრ ქვეყნებს დახმარების პაკეტის გაყოფა შესთავაზა.
უნგრეთი ერთადერთი ქვეყანაა ევროკავშირში, რომელიც რუსეთთან ომში მყოფი უკრაინისთვის ევროკავშირის მხარდაჭერის დაბლოკვას რეგულარულად ცდილობს. ნოემბერში ევროპული საბჭოს პრეზიდენტ შარლ მიშელისადმი წერილში უნგრეთის პრემიერ-მინისტრი ვიქტორ ორბანი წერდა, რომ ევროკავშირის ლიდერებმა ევროპული საბჭოს სამიტზე, რომელიც 14-15 დეკემბერს გაიმართება, უკრაინის გაწევრიანებაზე მოლაპარაკებების დაწყების საკითხი არ განიხილონ. გარდა ამისა, ორბანი აღნიშნავდა, რომ სამიტის დღის წესრიგში უკრაინის ფინანსური დახმარების საკითხის შეტანის წინააღმდეგი იყო.
უკრაინის ევროკავშირში გაწევრიანების საკითხზე ორბანის პოზიცია რისკის ქვეშ აყენებს მთლიანად გაფართოების პაკეტს, მათ შორის, საქართველოსთვის ევროკავშირის წევრობის კანდიდატი ქვეყნის სტატუსის მინიჭებას.
