ლუნდის უნივერსიტეტის (შვედეთი) პროფესორი, ღეროვანი უჯრედების ცენტრის კვლევითი გუნდის ხელმძღვანელი ზაალ კოკაია საუბრობს პრეპარატ Voxzogo-ს შესახებ, რომლის დაფინანსებასაც საქართველოში აქონდროპლაზიის მქონე ბავშვების მშობლები წელიწადზე მეტია ითხოვენ. ექიმი ამბობს, რომ ეს პრეპარატი არა მხოლოდ ბავშვების ზრდას უწყობს ხელს, არამედ მძიმე სიმპტიმებსაც ამსუბუქებს.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
„აქონდროპლაზია გენეტიკური დაავადებაა, რომელიც განაპირობებს არაპროპორციულ ზრდას და მოკლე კიდურებს. იგი გამოწვეულია ერთ-ერთი გენის სტრუქტურის ცვლილებით, რაც იწვევს ამ გენით კოდირებული ცილის გაძლიერებულ წარმოქმნას. ეს კი, თავის მხრივ, ბავშვის ზრდის პროცესში ხრტილის ძვლად გარდაქმნას აფერხებს, კიდურების ძვლების შენელებულ ზრდას იწვევს და ამასთან, დაკავშირებულია ბევრ სხვა სიმპტომთან.
ახალი პრეპარატი Voxzogo იწვევს დეფექტური გენის მიერ წარმოქმნილი ცილის რაოდენობის შემცირებას და შესაბამისად, ხრტილი უფრო ადვილად გარდაიქმნება ძვლად.
Voxzogo-ს უსაფრთხოება და ეფექტიანობა შეფასდა ძალიან დეტალურად ჩატარებულ და საეწმუნო ე.წ. მესამე ფაზის კლინიკურ კვლევაში. მისი გვერდითი ეფექტები მიღებულ დადებით შედეგებთან შედარებით მინიმალურია.
ეს პრეპარატი ამერიკის წამლებისა და საკვების ადმინისტრაციამ 2021 წლის ნოემბერში დაამტკიცა. ის ფაქტი, რომ წამალი დაამტკიცეს აჩქარებული და პრიორიტეტული წესით, ზედმეტი ბიუროკრატიული ფორმალობების გარეშე, იმაზე მიუთითებს, რომ ეს პრეპარატი ეფექტურია და ძალიან საჭიროა პაციენტებისთვის.
Voxzogo აღიარებულია ევროკავშირისა და იაპონიის რეგულატორების მიერ. ეს პრეპარატი არა მარტო ხელს უწყობს ბავშვების ზრდას, არამედ, რაც ძალიან მნიშვნელოვანია, ამსუბუქებს მძიმე სიმპტომებს. ეს პრეპარატი ბავშვებს ასევე დაეხმარება საზოგადოებაში ადაპტაციაში, მისცემს თავის მოვლისა და ცხოვრების ხარისხის გაუმჯობესების შანსს“, -მბობს ზაალ კოკაია.
აქონდროპლაზიის დიაგნოზის მქონე ბავშვების მშობლებმა თბილისში, მთავრობის ადმინისტრაციასთან მერვე ღამე გაათიეს სახელმწიფო პროგრამით პრეპარატ Voxzogo-ს დაფინანსების და პრემიერ-მინისტრთან შეხვედრის მოთხოვნით.
24 აპრილს, მთავრობის სხდომაზე, ირაკლი ღარიბაშვილმა განაცხადა, რომ ბავშვებისთვის მედიკამენტის შესაძენად საჭირო 10 მილიონი ლარი მთავრობისთვის „არ არის პრინციპული და კრიტიკული“. ღარიბაშვილის თქმით, აქონდროპლაზიის მქონე ბავშვების სიცოცხლეს საფრთხე არ ემუქრება და ვიდრე მთავრობა დაფინანსების საკითხზე გადაწყვეტილებას მიიღებს, საჭიროა დამატებითი კვლევების დასრულება.
ჯანდაცვის მინისტრის პირველმა მოადგილემ, თამარ გაბუნიამ განაცხადა, რომ თუ სექტემბრამდე ევროკავშირის ორი-სამი ქვეყანა მედიკამენტის აქტიურ დანერგვას დაიწყებს, სამინისტროს ექნება „მეტად მყარი საფუძველი“ იმისთვის, რომ პრეპარატის ქვეყანაში შემოტანაზე მოლაპარაკება დაიწყოს. ამასთან, გაბუნიამ თქვა, რომ პრეპარატთან დაკავშირებით ზედმეტი მოლოდინი არ უნდა იყოს, ვინაიდან ის არის „კონკრეტულად ზრდის მასტიმულირებელი მედიკამენტი“ და დანარჩენ სიმპტომებზე, რაც შეიძლება ბავშვებს ჰქონდეთ, „სხვა ტიპის ჩარევაა საჭირო“.
იშვიათი გენეტიკური დაავადების მქონე ბავშვების მშობლები აცხადებენ, რომ მოცდის დრო არ აქვთ, რადგან მას შემდეგ, რაც ბავშვები გარჯვეულ ასაკს მიაღწევენ, პრეპარატი ეფექტურობას დაკარგავს.
