Դիմում են կառավարությանը՝ Ռուսաստանի հետ վիզային ռեժիմ սահմանել և հրաժարվել ուղիղ չվերթներից

Պետիցիան ստորագրողները կարծում են, որ Ռուսաստանի հետ մերձեցումը նշանակում է հեռացում Եվրոպական միությունից և քաղաքակիրթ աշխարհից, կհանգեցնի ռազմավարական գործընկերների կորստի, Ռուսաստանից տնտեսական և քաղաքական կախվածության, Վրաստանի տարածքային ամբողջականության վերականգնումից հրաժարվելու և Ռուսաստանի մաս դառնալու։

Բացի այդ, պետիցիայում ընդգծվում է, որ՝

• Ռուսաստանն օկուպացրել է Վրաստանի 20%-ը, և սողացող օկուպացիան այսօր նույնպես շարունակվում է,
• Ռուսաստանը ագրեսոր պետություն է, որը գրավում և ավերում է Ուկրաինայի քաղաքները և սպանում բնակչությանը,
• Ռուսաստանը գնալով ավելի ու ավելի է մեկուսացվում միջազգայնորեն: Միջազգային քրեական դատարանը Ռուսաստանի նախագահին ձերբակալելու օրդեր է տվել,
• Մինչ վրաց ժողովուրդը աջակցում է Ուկրաինային, իսկ վրացի մարտիկները զոհվում են Ուկրաինայի ազատության համար պայքարում, Վրաստանի կառավարության կողմից Ռուսաստանի հետ հարաբերությունների ջերմացումը դավաճանական քայլ է և ուղղված է պետականության դեմ,
• Ռուսաստանի քաղաքացիների անվերահսկելի հոսքը Վրաստան վտանգի տակ է դնում մեր երկրի անվտանգությունը,

Պետիցիան ստորագրողները կոչ են անում Վրաստանի իշխանություններին՝ սահմանել վիզային ռեժիմ Ռուսաստանի քաղաքացիների մուտքի համար, հրաժարվել Ռուսաստանի հետ ուղիղ չվերթների վերսկսումից, հրաժարվել Ռուսաստանի հետ գաղտնի գործարքներից և Վրաստանի Սահմանադրության համաձայն՝ ձեռնարկել բոլոր միջոցները Եվրոպական միությունում ինտեգրվելու համար։

2023 թվականի մայիսի 10-ին Ռուսաստանի նախագահ Վլադիմիր Պուտինը հրամանագիր է արձակել Վրաստանի հետ օդային հաղորդակցությունը վերականգնելու մասին, որը դադարեցվել էր գրեթե չորս տարի առաջ։ Բացի թռիչքների վերսկսումից, չեղարկվել է 2000 թվականից գործող վիզային ռեժիմը, և այսօրվանից՝ մայիսի 15-ից Վրաստանի քաղաքացիները կկարողանան Ռուսաստանի տարածք մուտք գործել առանց վիզայի։

Վրաստանի նախագահ Սալոմե Զուրաբիշվիլին մայիսի 10-ին արտակարգ ճեպազրույցում Պուտինի որոշումը որակել է հերթական ռուսական սադրանք, որը, ըստ նրա, մեծ մարտահրավերի առաջ է կանգնեցնում Վրաստանի կառավարությանը։ Նրա խոսքով, քանի որ Ռուսաստանը ագրեսոր է ողջ աշխարհի համար և վրացական տարածքների օկուպանտն է, նման ժեստը ժամանակավրեպ է և անընդունելի։ Զուրաբիշվիլին կոչ է արել կառավարությանը եռամսյա վիզային ռեժիմ սահմանել Ռուսաստանի քաղաքացիների համար։

Երկրի վարչապետ Իրակլի Ղարիբաշվիլին մայիսի 11-ին չվերթների վերականգնումն ու առանց վիզային ռեժիմը դրական է գնահատել. «Ուզում եմ բոլորին ասել, որ սա, իհարկե, մարդասիրական տեսանկյունից շատ դրական և ողջունելի որոշում է։ Ամեն ինչ և յուրաքանչյուր որոշում, որը կհեշտացնի մեր քաղաքացիների կյանքը, տեղաշարժը, բիզնեսով զբաղվելը, անկասկած, դրական է և ողջունելի»,- լրագրողներին ասել է նա։ Բացի այդ, Ղարիբաշվիլին նշել է, որ թռիչքներ կիրականացնեն միայն պատժամիջոցների չենթարկված ավիաընկերություններն ու ինքնաթիռները։

Եվրոպական հանձնաժողովը կոչ է անում Վրաստանին, որը հավակնում է դառնալ Եվրամիության թեկնածու երկիր, միանալ ավիացիայի ոլորտում Ռուսաստանի դեմ սահմանված պատժամիջոցներին և զգոն լինել պատժամիջոցները շրջանցելու հնարավոր փորձերի նկատմամբ։ Արտաքին հարաբերությունների և անվտանգության քաղաքականության հանձնաժողովի մամուլի խոսնակ Պիթեր Ստանոն նշել է, որ Վրաստանը չպետք է թույլ տա, որպեսզի անվտանգության խնդիրներ ունեցող ռուսական ինքնաթիռները մտնեն իր տարածք։ Նրա խոսքով՝ պատժամիջոցների պատճառով ռուսական ընկերությունների 95%-ը չի կարողանում թարմացնել կամ կատարելագործել օդանավերը, ինչն անհրաժեշտ է միջազգային տեխնիկական ու անվտանգության չափանիշները պահպանելու համար։

Ամերիկայի Միացյալ Նահանգները հնարավոր պատժամիջոցների մասին է զգուշացրել վրացական օդանավակայաններում աշխատող այն ընկերություններին, որոնք կսպասարկեն պատժամիջոցների ենթարկված ռուսական ինքնաթիռներին։ Պետքարտուղարության ներկայացուցիչը նշել է, որ այժմ, երբ արևմտյան հասարակությունն ամբողջությամբ հեռացել է ռուսական ռեժիմից, ժամանակը չէ, որ որևէ երկիր խորացնի իր հարաբերությունները Ռուսաստանի հետ: