ԿԸՀ-ն ռուսամետ «Ալտ Ինֆո» կուսակցությունը գրանցել է որպես ընտրական սուբյեկտ

Ընտրություններին մասնակցելու իրավունք ստանալու համար «Ալտ Ինֆո»-ն մարտի վերջին Կենտրոնական ընտրական հանձնաժողով է ներկայացրել ավելի քան 50 հազար ընտրողների ստորագրություն։ Կուսակցության առաջնորդներից Կոնստանտին Մորգոշիայի հրապարակած փաստաթղթից պարզ է դառնում, որ ստույգ է ճանաչվել 25 119 ստորագրություն, ինչը բավարար է կուսակցության՝ որպես ընտրական սուբյեկտ գրանցելու համար։

«Համակարգային ճնշման պայմաններում «Պահպանողական շարժում/Ալտ-Ինֆո»-ն հաջողությամբ անցել է ընտրական գրանցումը և ձեռք է բերել ընտրական սուբյեկտի կարգավիճակ՝ մասնակցելու 2024 թվականի ընտրություններին։ Շնորհավորում ենք մեր գաղափարակիցներին, պայքար միշտ արժե: Շնորհակալություն բոլոր այն մարդկանց, ովքեր վստահեցին մեզ։ Մեզ մեծ հաղթանակ է սպասվում»,- ասել է Մորգոշիան։

«Ալտ Ինֆո» խմբավորումը կուսակցություն է հիմնել 2021 թվականի վերջին, իսկ նույն թվականի հուլիսի 5-ին ակցիա է կազմակերպել ընդդեմ «Թբիլիսի փրայդի» կազմակերպած «Արժանապատվության երթի», որը վերածվել է լայնածավալ բռնության՝ լրագրողների և քաղաքացիական ակտիվիստների դեմ։ Երկու տարի անց՝ 2023 թվականի հուլիսին, «Ալտ Ինֆո»-ն խափանեց նաև մասնավոր տարածքում նախատեսված «Փրայդ ֆեստ»-ը։ Բռնության կազմակերպիչները պատասխանատվության չեն ենթարկվել։

2023 թվականի վերջին, այն բանից հետո, երբ Վրաստանը ստացավ ԵՄ անդամակցության թեկնածու երկրի կարգավիճակ, «Ալտ-Ինֆո»-ի անդամներն ու համակիրները ԵՄ դրոշ այրելու արշավ սկսեցին։

«Ալտ-Ինֆո/Պահպանողական շարժում»-ը 2022 թվականին ստացել է 577 034 լարի նվիրատվություն, 2023 թվականին՝ 36 634, իսկ այս տարի՝ 1 045 լարի։ Կուսակցությունը դատարանի կողմից տուգանվել է 217 482 լարիով՝ ոչ դրամական նվիրատվությունը թաքցնելու համար։ «Ալտ Ինֆո»-ին է պատկանում նաև հեռուստատեսությունը, որն ամեն ամիս հարյուր հազարավոր լարիով ֆինանսավորում է կուսակցության ղեկավարներից մեկի՝ Կոնստանտինե Մորգոշիայի թոշակառու հորաքույրը։