Կառավարությունը դիտարկում է Թբիլիսիի մերձակայքում նոր միջազգային օդանավակայանի կառուցման հարցը

«Սա մեր բավականին հավակնոտ որոշումն է, բայց կարծում եմ, որ այսօր մենք ունենք միջոցներ, փորձ, և որ ամենակարևորն է՝ տարածաշրջանում իրական ավիացիոն հանգույց դառնալու նպատակ։ Մենք բազմիցս ասել ենք, որ երկիրն ունի դրա ներուժը։ Մենք սկսել ենք աշխատել այս նպատակով»,- ասել է վարչապետը։

Իրակլի Ղարիբաշվիլիի խոսքով՝ կառավարությունը երկու տարբերակ է մշակել՝ գործող օդանավակայանի զարգացում ու ընդլայնում և նորի կառուցում։

«Այս օդանավակայանն ունի իր թերություններն ու սահմանափակումները և մեծ զարգացման հնարավորություն չի տալիս։ Հատկապես, եթե մենք ուզում ենք դառնալ ավիացիոն հանգույց տարածաշրջանում, այս օդանավակայանը և դրա գտնվելու վայրը, տարածքը մեզ թույլ չի տալիս։ Մենք այդ հարցը բարձրացրել ենք տնտեսական խորհրդում, քննարկել և եկել ենք այն եզրակացությանը, որ եթե ուզում ենք երկրի մասին հոգ տանել 20, 50 և նույնիսկ 100 տարվա հեռանկարում, մեր ապագա սերունդներին թողնելով ենթակառուցվածքներով պատշաճ օդանավակայան, անհրաժեշտ է նոր վայր ընտրել: Նման վայր Թբիլիսիում կա և կարելի է ասել, որ այն իդեալական է այս նպատակով, դա Վազիանիի նախկին օդանավակայանն է։ Իմ հանձնարարությամբ էկոնոմիկայի նախարարությունը մի քանի ամիս ակտիվորեն աշխատում է այս ուղղությամբ։

Մեր ցանկությունն է բերել լավագույն նախագծողների, շինարարների, ճարտարապետների՝ ուսումնասիրելու այս նախագիծը։ Պետք է նախ լավ ուսումնասիրենք այս վայրը, հետո վերջնական որոշում կայացնենք։

Խոսքը ժամանակակից միջազգային կարգի օդանավակայանի կառուցման մասին է, որն իրականում կարող է հանգույց դառնալ։ Այն պետք է լինի տարանցիկ-լոգիստիկ և ժամանակակից ուղևորներին ուղղված միջազգային կարգի օդանավակայան։

Նաև խոսեցինք «լավ տերմինալների» կառուցման մասին և այլն։ Մենք մանրամասն կքննարկենք դա, և ես կարծում եմ, որ սա շատ հավակնոտ, բայց անհրաժեշտ նախագիծ է երկրի համար»,- ասել է Իրակլի Ղարիբաշվիլին։

Վարչապետի խոսքով՝ վերջին տարիներին ամեն տարի Վրաստանի օդանավակայաններում ուղևորահոսքն ավելանում է գրեթե 35 տոկոսով։

«Վրացական օդանավակայաններից ուղիղ չվերթներ են իրականացվում աշխարհի 58 քաղաքներ, և մենք կանոնավոր օդային հաղորդակցություն ունենք աշխարհի 31 երկրների հետ։ Հետևաբար, մենք հիմա կսկսենք ուսումնասիրությունը, կբերենք աշխարհի առաջատար ավիացիոն խորհրդատվական ընկերությունների, կներգրավենք նրանց, կանցկացնենք շատ մանրամասն ուսումնասիրություն և դրանից հետո վերջնական որոշում կկայացնենք։ Թբիլիսին և երկիրը պետք է ունենան լավագույն օդանավակայաններից մեկը»,- ​​ասել է Ղարիբաշվիլին։

Մայիսին ՌԴ նախագահ Վլադիմիր Պուտինի որոշման արդյունքում վերականգնվել են Վրաստանից Ռուսաստան ուղիղ չվերթները։ Մոսկվա-Թբիլիսի առաջին չվերթն իրականացրել է ռուսական «Ազիմուտ» ավիաընկերությունը մայիսի 19-ին, իսկ Red Wings-ը, որը թույլտվություն է ստացել Վրաստանի քաղաքացիական ավիացիայի գործակալությունից, թռիչքները կսկսի հունիսին՝ Սոչի-Թբիլիսի-Սոչի և Մոսկվա-Քութայիսի-Մոսկվա երթուղիներով։ Մոսկվայի ուղղությամբ չվերթներ է իրականացնում նաև վրացական Georgian Airways ավիաընկերությունը։

Ռուսաստանի՝ Ուկրաինա ներխուժելուց և պատերազմի սկսվելուց հետո ԵՄ անդամ երկրները և ԱՄՆ-ն արգելել են ուղիղ չվերթները Ռուսաստանից։

Այս թեմայով՝

«Դեպի Եվրոպա Քութայիսիով». ինչ են գրում ռուսական կառավարական լրատվամիջոցները չվերթների վերսկսումից հետո