Ուկրաինայում կռվող «Վրացական լեգեոնի» հրամանատար Մամուկա Մամուլաշվիլիի խոսքով՝ կազմավորման մոտ 300 անդամներ, որոնց մեծ մասն այժմ Ուկրաինայում են, Վրաստանում հետախուզման մեջ են գտնվում։
Լրահոս
Ընթերցողի ընտրանի
- 1 ՆԳՆ Սպասարկման գործակալությունը սկսել է մեկ տարի ժամկետով միջազգային վարորդական վկայականներ տրամադրել
- 2 ՄԱԿ-ում Ռուսաստանի ներկայացուցիչը կրկնել է Օգոստոսյան պատերազմի վերաբերյալ «Վրացական երազանքի» հայտարարությունը
- 3 ՌԴ արտաքին հետախուզությունը հայտնում է, որ ԱՄՆ-ը «գունավոր հեղափոխություն» է նախապատրաստում Վրաստանում
- 4 «Վրացական երազանքը» դադարել է երազանք լինելուց, այն դարձել է մղձավանջ. նախագահ
- 5 Ուկրաինացիները Կուրսկում վերահսկում են 28 բնակավայր, 2 հազար մարդու ճակատագրից տեղյակ չենք․ Սմիրնով
- 6 Կոբախիձեն 22 ընտրատարածքներում ներկայացրել է «Վրացական երազանքի» պատվիրակներին
Հուլիսի 21-ին հրապարակված The Insider-ին տված հարցազրույցում Մամուկա Մամուլաշվիլին արձագանքել է Ուկրաինայի կողմից կռվող քաղաքացիներին Վրաստանի Պետական անվտանգության ծառայություն կանչելուն։
«Իրադարձությունների նման զարգացում ես կանխատեսել էի այն բանից հետո, երբ Ռուսաստանը սկսեց մեզ հետախուզում հայտարարել։ Դա արվել է, որպեսզի վրացական իշխանությունները մեզ ձերբակալելու պատճառ ունենան։ Ռուսական և վրացական հատուկ ծառայություններն այսօր աշխատում են սինխրոնային։
Վրաստան վերադարձած մեր տղաներից շատերին վրացական հատուկ ծառայությունները խորհուրդ են տվել հեռանալ՝ ասելով. «Այստեղ շատ ռուսներ կան, մենք ձեզ չենք կարող պաշտպանել, խնդրում ենք հեռացեք»։ Չեմ բացառում, որ կամավորների մի մասը կարող է հանձնվել Ռուսաստանին, բայց միայն աշնան ընտրություններից հետո։ Ես Ամերիկայի Միացյալ Նահանգներում արդեն կիսվել եմ վրացի մարտիկներին սպառնացող սպառնալիքների մասին տեղեկություններով։ Վստահ եմ, որ Վրաստանի կառավարության դեմ պատժամիջոցներ կլինեն։ Մենք քայլ առ քայլ կհեշտացնենք պատժամիջոցների կիրառումը բոլոր նրանց դեմ, ովքեր մասնակցել են դրան»,- ասել է Մամուլաշվիլին։ Մեկ ամիս առաջ Ռուսաստանը նրա հիմնադրած «Վրացական լեգեոնը» ճանաչել է «ահաբեկչական կազմակերպություն»։
Պետական անվտանգության ծառայությունը վերջին օրերին հարցաքննության է կանչում Ուկրաինայում կռվող վրացիներին, ովքեր այս պահին գտնվում են Վրաստանում։ Նրանց թվում են Գելա Կախաբրիշվիլին, Վաժա Ցեցաձեն, Նադիմ Խմալաձեն, Լաշա Ճիղլաձեն, Լաշա Ռուխաիան և Կոնստանտին Ջղամաիան։
Աբխազիայի և 2008 թվականի Օգոստոսյան պատերազմների վետերան Գելա Կախաբրիշվիլին և նրա փաստաբան Միխեիլ Ռամիշվիլին հուլիսի 23-ին Թբիլիսիի քաղաքային դատարանում դատավորի ներկայությամբ հարցաքննությունն ավարտելուց հետո հայտարարել են, որ ՊԱԾ-ի քննիչի հարցերը վերաբերել են Բիձինա Իվանիշվիլիի և «Վրացական երազանքի» պաշտոնյաների դեմ ահաբեկչության նախապատրաստմանը։ Այսօր՝ հուլիսի 24-ին, ՊԱԾ-ը հաստատել է իշխանամետ լրատվամիջոցների կողմից ավելի վաղ տարածված տեղեկությունը, թե հետաքննվում է «Բիձինա Իվանիշվիլիի սպանության նախապատրաստման փաստերը»։
«Պետական անվտանգության ծառայությունը հետաքննում է Ուկրաինայում գտնվող Վրաստանի կառավարության նախկին բարձրաստիճան պաշտոնյաների և իրավապահ մարմինների նախկին աշխատակիցների կողմից կազմակերպված և ֆինանսավորվող հանցավոր գործողությունների, այդ թվում՝ «Վրացական երազանք» կուսակցության պատվավոր նախագահ Բիձինա Իվանիշվիլիի սպանության նախապատրաստման փաստերը։ Նշված հանցավոր գործողությունների նպատակը անկարգություններ ստեղծելու և իշխանությունը թուլացնելու ֆոնին, կործանարար ուժերով պետական իշխանությունը բռնի տապալելն է»,- նշել են ՊԱԾ-ում, սակայն չեն հստակեցրել, թե երբ և ինչ հիմքով է սկսվել հետաքննությունը։
Գործը հարուցվել է Քրեական օրենսգրքի 18-323-րդ և 315-րդ հոդվածների առաջին մասերով, որոնք ենթադրում են ահաբեկչության նախապատրաստում և պետական իշխանությունը տապալելու դավադրություն։
