Մենք պատրաստվում ենք բարձրացնել Վրաստանի հարցը, ԵՄ-ն պետք է շատ հստակ պատասխան ունենա․ Ցահկնա

Լրագրողի այն հարցին, թե ինչ որոշումներ է ակնկալում Եվրամիությունից, էստոնացի դիվանագետը պատասխանել է.

«Նախ, մենք ցանկանում ենք հանձնաժողովի կողմից ինը քայլերի վերլուծությանը ծանոթանալ, ինչպես նաև արձագանքներ պատրաստել, նկատի ունեմ թեկնածու երկրի կարգավիճակը, ինչպես նաև հնարավորության դեպքում անձնական պատժամիջոցները, բայց նաև վիզային ռեժիմի վերանայումը, քանի որ այն ամենը, ինչ ստացել է Վրաստանի կառավարությունը, նվեր չէ։ Վրաստանի կառավարությունն այժմ պետք է առաջ շարժվի այնպես, ինչպես համաձայնեցված է Եվրամիության և վրաց ժողովրդի հետ»:

Այսօր Արտաքին գործերի խորհրդի նիստից առաջ Եվրամիության արտաքին գործերի և անվտանգության քաղաքականության գերագույն ներկայացուցիչ Ժոզեֆ Բորելը հայտարարել է, որ «Վրաստանի կառավարությունը շեղվում է եվրոպական ճանապարհից»։

Արտաքին հարաբերությունների խորհուրդը կանցկացվի երկու օր՝ Եվրամիության անդամ 27 երկրների արտաքին գործերի նախարարների մասնակցությամբ և այն կղեկավարի Ժոզեֆ Բորելը։

Օրեր առաջ Financial Times-ը հայտնել էր, որ ի պատասխան «օտարերկրյա գործակալների» մասին օրենքի վերաբերյալ կառավարության անհարկի դիրքորոշման՝ ԵՄ մի քանի երկրներ պահանջում են պատժամիջոցներ սահմանել Վրաստանի դեմ, այդ թվում՝ դադարեցնել առանց վիզայի ռեժիմը։ Լրատվականը գրել է, որ Էստոնիան, Նիդերլանդները, Չեխիան և Շվեդիան այն երկրներից են, որոնք կոչ են անում հաջորդ շաբաթ ԵՄ ԱԳ նախարարների հանդիպմանը քննարկել զսպող միջոցներ: Financial Times-ին ծանոթ աղբյուրները հայտնել են, որ Վրաստանի քաղաքացիների համար ԵՄ առանց վիզայի ճանապարհորդության չեղարկումից բացի, քննարկվում են նպատակային պատժամիջոցներ և ԵՄ ֆինանսավորման սառեցում։