Մեր նպատակը պետք է դառնա Ուկրաինայի քաղաքական ռեժիմի ապամոնտաժումը. Մեդվեդև

«Ուկրաինայի պետության նացիստական ​​քաղաքական ռեժիմը մշտական, ուղղակի և ակնհայտ սպառնալիք է Ռուսաստանի համար։ Ուստի մեր ժողովրդի և մեր երկրի սահմանները պաշտպանելուց բացի, մեր հետագա գործողությունների նպատակը, իմ կարծիքով, պետք է լինի Ուկրաինայի քաղաքական ռեժիմի լիակատար ապամոնտաժումը»,- ասել է Մեդվեդևը։

Ուկրաինայի անվտանգության ծառայությունը Դմիտրի Մեդվեդևի նկատմամբ հետախուզում է հայտարարել։ Նրա դեմ գործը հարուցված է քրեական օրենսգրքի 110-րդ հոդվածի երկրորդ մասով, որը ենթադրում է հարձակում Ուկրաինայի տարածքային ամբողջականության դեմ։ Հետախուզվողների տվյալների բազայում ներառվել են Ռուսաստանի ևս 700 քաղաքացիներ, այդ թվում՝ Դումայի պատգամավորներ, սենատորներ, Անվտանգության խորհրդի և կառավարության անդամներ։

Հոկտեմբերի 10-ի առավոտյան Ռուսաստանը հրթիռային հարվածներ է հասցրել Կիևի և Ուկրաինայի այլ քաղաքների վրա։ Ուկրաինայի զինված ուժերի գլխավոր շտաբի տվյալներով՝ Ռուսաստանը կիրառել է 84 թևավոր հրթիռ և 24 անօդաչու թռչող սարք, այդ թվում՝ 13 իրանական «Շահիդ»։ ՀՕՊ համակարգերը ոչնչացրել են 56 թիրախ, որոնցից 43-ը՝ թևավոր հրթիռներ։

Պայթյունների հետևանքով առնվազն 11 մարդ է զոհվել, ավելի քան 70-ը՝ վիրավորվել։ Վնասվել է 70 օբյեկտ, որոնցից 29-ը կրիտիկական նշանակություն ունեն։ Ջերմային կայանների և էլեկտրաենթակայանների ռմբակոծությունների պատճառով Ուկրաինան ստիպված է այսօրվանից դադարեցնել էլեկտրաէներգիայի արտահանումը Եվրոպա՝ սեփական էներգահամակարգը կայունացնելու համար։

Ռուսաստանի նախագահ Վլադիմիր Պուտինը հայտարարել է, որ ուկրաինական քաղաքների ռմբակոծումը պատասխանն էր հոկտեմբերի 8-ին Ղրիմի կամրջի վրա տեղի ունեցած պայթյունին, թեև ուկրաինական ռազմական հետախուզությունը հայտնում է, որ ռուսական օկուպացիոն ուժերը Կրեմլից հրաման են ստացել հոկտեմբերի 2-ին և 3-ին նախապատրաստվել զանգվածային հարձակումներ իրականացնելուն՝ քաղաքացիական ենթակառուցվածքների վրա:

Ռուսաստանի արարքը դատապարտել են ԵՄ երկրները։ «Ռուսաստանը ևս մեկ անգամ ցույց տվեց աշխարհին, թե ինչ է իրենից ներկայացնում՝ ահաբեկչություն և դաժանություն։ Հանցագործը պետք է պատասխան տա: Մենք սգում ենք զոհերի համար և մեր անկեղծ ցավակցությունն ենք հայտնում մեր ուկրաինացի ընկերներին։ Ես գիտեմ, որ ուկրաինացիները չեն վախենա»,- ասել է Եվրահանձնաժողովի նախագահ Ուրսուլա ֆոն դեր Լեյենը։

Ամերիկայի Միացյալ Նահանգների նախագահ Ջո Բայդենի խոսքով՝ այսօրվա հրթիռային հարձակումը ևս մեկ անգամ ցույց է տալիս ուկրաինացի ժողովրդի դեմ Պուտինի անօրինական պատերազմի դաժանությունը։ Բայդենի խոսքով՝ ԱՄՆ-ն իր գործընկերների ու դաշնակիցների հետ կշարունակի օգնել Ուկրաինային՝ պաշտպանելու երկիրը և ազատությունը։

Միավորված ազգերի կազմակերպության (ՄԱԿ) գլխավոր քարտուղար Անտոնիո Գուտերեշն ասել է, որ հրթիռային հարվածները «պատերազմի ևս մեկ անընդունելի էսկալացիա են ներկայացնում, և ինչպես միշտ, քաղաքացիական անձինք վճարում են ամենաբարձր գինը»:

Հոկտեմբերի 11-ին հատուկ նշանակվել է «Մեծ յոթնյակի» անդամ երկրների (Կանադա, Ֆրանսիա, Գերմանիա, Իտալիա, Ճապոնիա, Մեծ Բրիտանիա և ԱՄՆ) ղեկավարների հանդիպումը։ Հանդիպմանը ելույթով հանդես կգա նաև Ուկրաինայի նախագահ Վլադիմիր Զելենսկին։