Մզիա Ամաղլոբելիին ազատ արձակելու պահանջով կառավարության շենքի մոտ ցույց է տեղի ունեցել

Լրագրողները կոչ են անում դատախազությանը պահանջել փոխել Մզիա Ամաղլոբելիի նկատմամբ կիրառված խափանման միջոցը։

«Մզիա Ամաղլոբելիի ազատազրկումն անհիմն է։ Նա ցուցադրաբար պատժվել է միայն իր մասնագիտական ​​գործունեության համար և այն պատճառով, որ բոլոր ռեժիմների ժամանակ պաշտպանել է ժողովրդավարությունը, մարդու իրավունքները և խոսքի ազատությունը։ Վերաքննիչ դատարանը պետք է ուղղի առաջին ատյանի սխալը։ Անմիջապես բաց թողեք Մզիային։

Մզիայի վրա թքել են, նվաստացրել, փորձել են նրան ծեծել ոստիկանությունում, և այս փաստը չի կարող չհետաքննվել, անարձագանք մնալ։ Մենք պահանջում ենք անհապաղ սկսել հետաքննությունը և պատժել մեղավորներին»,- ասել է «Պուբլիկա»-ի խմբագիր Լիկա Զակաշվիլին։

Ակցիան է անցկացվել նաև Բաթումիում՝ Աջարիայի դատախազության մոտ։ Հանրահավաքի մասնակիցները պահանջել են դադարեցնել Բաթումիի ոստիկանապետ Իրակլի Դգեբուաձեի պաշտոնեական լիազորությունը, քանի դեռ չեն հետաքննվել Մզիա Ամաղլոբելիի նկատմամբ բռնության և վատ վերաբերմունքի փաստերը, որոնք տեղի են ունեցել նրա ձերբակալությունից առաջ և հետո։

Լրագրողներն այսօր կգնան հատուկ քննչական ծառայություն և կպահանջեն հանդիպում ծառայության ղեկավար Կոկա Կացիտաձեի հետ։

Հունվարի 11-ի լույս 12-ի գիշերը Մզիա Ամաղլոբելին երկու անգամ ձերբակալվել է Աջարիայի ոստիկանության գլխավոր վարչության մոտ բողոքի ակցիայի ժամանակ։ Առաջին անգամ նրան ձերբակալել են բաժանմունքի օժանդակ մասնաշենքի պատին պաստառ փակցնելու համար։ Մոտ երկու ժամից նա և երեք այլ կին ակտիվիստներ ստորագրության հիման վրա ազատ են արձակվել, սակայն կարճ ժամանակ անց կրկին ձերբակալվել են Բաթումիի ոստիկանապետ Իրակլի Դգեբուաձեի վրա հարձակվելու պատրվակով։ Փաստաբաններին երեք ժամ թույլ չեն տվել հանդիպել նրա հետ։

«Բաթումելեբին» տեսանյութ է հրապարակել, որտեղ երևում է, որ Մզիա Ամաղլոբելիին ձերբակալելուց հետո ոստիկանները նրան հայհոյում են։ Բաթումիի ոստիկանապետը հայհոյել է նրան ու սպառնացել։

Ինչպես ասել է Մզիա Ամաղլոբելին, Իրակլի Դգեբուաձեն ոստիկանական բաժանմունքում մի քանի անգամ փորձել է հարձակվել իր վրա և թքել դեմքին։ Լրագրողը Հատուկ քննչական ծառայությանը հայտնել է նաև, որ Դգեբուաձեի հրամանով իրեն թույլ չեն տվել ջուր խմել և օգտվել զուգարանից։

Հունվարի 14-ին Բաթումիի քաղաքային դատարանի դատավոր Նինո Սախելաշվիլին բավարարել է դատախազի միջնորդությունը և Մզիա Ամաղլոբելիին դատապարտել երկամսյա նախնական կալանքի։ Նա տեղափոխվել է Ռուսթավիի թիվ 5 կանանց քրեակատարողական հիմնարկ։

Հունվարի 15-ին փաստաբանները դատավոր Սախելաշվիլիի որոշումը բողոքարկել են Քութայիսիի վերաքննիչ դատարանում, թեև դեռևս հայտնի չէ՝ դատարանը բողոքը ընդունելի ճանաչե՞լ է, թե՞ ոչ։

Մզիա Ամաղլոբելիին առաջադրված մեղադրանքը՝ հարձակում ոստիկանի վրա, նախատեսում է ազատազրկում 4-ից 7 տարի ժամկետով։