Նոդար Մելաձեն ասում է, որ իր մեքենայից հիշողության քարտ են գողացել

«Դա ինձ՝ որպես լրագրողի, գողության իմիտացիայով վախեցնելու փորձ էր, քանի որ եթե սովորական գողություն լիներ, մեքենայից տեսածը կվերցնեին։ Իմ ժամացույցը, մանկական ժամացույցը, ակնոցները, անձնական իրերը, ինչ էլ որ մարդ պահի մեքենայում, ամեն ինչ մեքենայի մեջ է, ոչինչ չի պակասում։ Վերցրել են միայն արտաքին հիշողության քարտը, աշխատանքային, որն օգտագործել եմ որպես լրագրող՝ նյութը վերբեռնել ու ներբեռնել։ Նրանց հետաքրքրում էին այն փաստաթղթերը, որոնք ես ունեի պահեստավորման տուփի մեջ, թղթերը դուրս էին շպրտված, ցրված, կարծես ինչ-որ կոնկրետ փաստաթուղթ են փնտրել։ Ականջակալները, որոնք դրված էին արտաքին հիշողության քարտի հետ, տարել են»,- ասել է Նոդար Մելաձեն։

Նրա խոսքով՝ դեպքը տեղի է ունեցել երեկ գիշերը՝ ժամը 12:00-ից 3:00-ն ընկած ժամանակահատվածում։ Մեքենան կայանված է եղել Կոտե Աբխազի փողոցում։

Նոդար Մելաձեն կատարվածը կապում է իր մասնագիտական ​​գործունեության հետ և հիշեցնում «Առաջին հերթին Վրաստանը» շարժման առաջնորդ Վատո Շաքարիշվիլիի սպառնալիքը, որ ինքը լինելու է հարձակման հաջորդ օբյեկտը՝ «Ֆորմուլա» հեռուստաընկերություն հիմնադիրներից մեկի՝ Միշա Մշվիլդաձեի վրա հարձակումից հետո։

«Նախ սկսվեց ինձ վրա հարձակվելու բանավոր սպառնալիքներով։ Կոկա Կացիտաձեի [Հատուկ քննչական ծառայություն- խմբ.] գերատեսչությունը, որը հմուտ է դարձել գործերը մոռացության մատնելու հարցում, արդեն երկու շաբաթ է, ինչ հետաքննում է այս գործը, և ինձ՝ որպես տուժողի, ոչ մի նորություն չկա։ Այժմ նրանք անցել են գործողության և փորձ է արվել ահաբեկել ինձ ավազակային հարձակման իմիտացիայով»,- ասում է Մելաձեն։

Երեկ երեկոյան դեպքի վայրում աշխատել են ոստիկանության աշխատակիցները։ Նոդար Մելաձեն այսօր հրավիրվել է հարցաքննության։

Հունիսի 27-ին Թբիլիսիում հարձակման է ենթարկվել «Ֆորմուլա» հեռուստաընկերության հիմնադիրներից մեկը։ Նրան ծեծել են և վիրավորել։ Հարձակումը ֆիքսել են տեսահսկողության տեսախցիկները։ «Ես եմ ծեծել նրան, քանի որ նա եկեղեցուն անվանում է հանցագործ և ասում, որ խաչը բռնության խորհրդանիշ է։ Նա հայհոյում է պատրիարքին, վրաց ազգին ու պաշտպանում համասեռամոլներին։ Նաև ֆեյսբուքում հայհոյում է ինձ և իմ ընկերներին։ Ես չեմ պատրաստվում ոչ մի տեղ թաքնվել»,- հանցագործության հաջորդ օրը սոցցանցում գրել է քաղաքացի Նիկոլոզ Գուգեշաշվիլին։ Նշենք, որ նույն տեքստով և ձևով հանցագործությունը խոստովանել է նաև քաղաքացի Սոսո Մաիսուրաձեն, ով հունիսի 17-ին հարձակվել էր ընդդիմադիր «Գիրչի՝ ավելի շատ ազատություն» կուսակցության առաջնորդ Զուրաբ Ջափարիձեի վրա և վիրավորել նրան։ Մշվիլդաձեի վրա հարձակում գործելու մեղադրանքով ձերբակալված Գուգեշաշվիլիի նկատմամբ որպես խափանման միջոց է ընտրվել կալանքը, սակայն «Ֆորմուլա» հեռուստաընկերությունը հանցագործության տեսագրությունների հիման վրա պնդում է, որ հարձակումը կազմակերպել է Պետական ​​անվտանգության ծառայությունը և գործող անձանցից մեկը ՊԱԾ-ի քննիչ Գիորգի Մումլաձեն է։

Այս թեմայով՝

Քննադատական լրատվամիջոցների դեմ հանցագործություններն աճել են 4 անգամ․ «Երազանքի» խրախուսած բռնությունը