ՊԱԾ-ը հարցաքննության է կանչել Փոթիի սակրեբուլոյի անդամ, Ուկրաինայում կռվող Լաշա Ռուխաիային

«Ինչո՞ւ է գործը «գաղտնի»։ Որովհետև դրանք իրենց ստեղծած հեքիաթներն են։ Տարիների ընթացքում ինձ բազմիցս կանչել են ՊԱԾ, նույնիսկ Ճիկաիձեի օրոք [ՆԳ նախարար 2013-15թթ.- խմբ.], երբ ասում էին, որ «Մայդան» ենք փորձում անել։ Այդ գործը նույնպես դարակում է։

Հիմա նորից  կանչում են։ Ինձ համար այս ամենը ծիծաղելի է։ Բիձինա Իվանիշվիլին հանձնարարություն է ստացել Պուտինից, և դա իրենց պետք է նախընտրական շրջանում, իբր դրանով կվախեցնեն ռազմիկներին։ Վրացական մարտիկները մեր երկիրը չեն տապալելու։ Մենք տապալելու ենք միայն ու միայն Ռուսաստանի չարի կայսրությունը»,- ասել է Ռուխաիան։

Լաշա Ռուխաիան կռվել է Ուկրաինայում «Վրացական լեգեոնի» շարքերում, և ինչպես ինքն է ասում՝ մեկ տարի է՝ Վրաստանում է։ Բացի նրանից, ՊԱԾ-ը հարցաքննության է հրավիրել Գելա Կախաբրիշվիլիին, Վաժա Ցացաձեին, Նադիմ Խմալաձեին, Լաշա Ճիղլաձեին և Կոնստանտին Ջղամաիային։

Ինչպես այսօր հայտարարել է Վրաստանի պետական ​​անվտանգության ծառայությունը՝ հետաքննում են «Ուկրաինայում գտնվող Վրաստանի կառավարության նախկին բարձրաստիճան պաշտոնյաների և իրավապահ մարմինների նախկին աշխատակիցների կողմից կազմակերպված և ֆինանսավորվող հանցավոր գործողությունների, այդ թվում՝ «Վրացական երազանք» կուսակցության պատվավոր նախագահ Բիձինա Իվանիշվիլիի սպանության նախապատրաստման փաստերը»։ Գործը հարուցվել է Քրեական օրենսգրքի 18-323-րդ և 315-րդ հոդվածների առաջին մասերով, որոնք ենթադրում են ահաբեկչության նախապատրաստում և պետական ​​իշխանությունը տապալելու դավադրություն։

«Վրացական լեգեոնի» հրամանատար Մամուկա Մամուլաշվիլին հայտնել է, որ Վրաստանում հետախուզման մեջ են գտնվում կազմավորման մոտ 300 անդամներ, որոնց մեծ մասն այժմ գտնվում է Ուկրաինայում։  The Insider-ին տված հարցազրույցում Մամուկա Մամուլաշվիլին արձագանքել է Ուկրաինայի կողմից կռվող քաղաքացիներին Վրաստանի Պետական ​​անվտանգության ծառայություն կանչելուն։ «Իրադարձությունների նման զարգացում ես կանխատեսել էի այն բանից հետո, երբ Ռուսաստանը սկսեց մեզ հետախուզում հայտարարել։ Դա արվել է, որպեսզի վրացական իշխանությունները մեզ ձերբակալելու պատճառ ունենան։ Ռուսական և վրացական հատուկ ծառայություններն այսօր աշխատում են սինխրոնային»,- կարծում է Մամուկա Մամուլաշվիլին։

Ընդդիմության կարծիքով՝ իշխանությունը փորձում է վախեցնել մարդկանց ու պահպանել իշխանությունը «պետական ​​հեղաշրջման» մասին հայտարարություններով։