Շոլցն ու Մակրոնն ասում են, որ ռուսական օրենքը շեղում է Վրաստանին եվրոպական ճանապարհից

«Մենք՝ Գերմանիան և Ֆրանսիան, խորը մտահոգություն ենք հայտնում Վրաստանում ստեղծված իրավիճակի կապակցությամբ։ Երկու երկրներն էլ միշտ աջակցել են Վրաստանի եվրոպական ուղուն, և 2023 թվականի դեկտեմբերին մենք աջակցել ենք Եվրոպական խորհրդի որոշմանը՝ Վրաստանին թեկնածուի կարգավիճակ տրամադրելու վերաբերյալ։

Մենք շատ ենք ցավում Վրաստանի կառավարության և իշխող կուսակցության որոշման համար՝ շեղվել այս ճանապարհից՝ գործելով ընդդեմ մեր ընդհանուր եվրոպական արժեքների և վրաց ժողովրդի ձգտումների, այդ թվում՝ այսպես կոչված «օտարերկրյա ազդեցության թափանցիկության» մասին օրենքն ընդունելով։

Վրաստանի եվրոպական ուղին սահմանված է, սակայն առաջընթացի արագությունն ու ուղղությունը կախված է Վրաստանից»,- ասված է Գերմանիայի և Ֆրանսիայի ղեկավարների հայտարարության մեջ։

Օրերս Ֆրանսիայում Վրաստանի դեսպան Գոչա Ջավախիշվիլին ռուսական օրենքի պատճառով հրաժարական ներկայացրեց։ Ինչպես նշել է դիվանագետը, երկրի բարեկամների և օտարերկրյա գործընկերների հետ հարաբերություններում ստեղծված մթնոլորտն ու տրամադրությունը՝ կապված վերամարմնավորված օրինագծի հետ, չափազանց դժվարացնում է իր առաքելությունը՝ որպես Վրաստանի արտակարգ և լիազոր դեսպան։

Վրաստանի խորհրդարանն այսպես կոչված «օտարերկրյա գործակալների» մասին ռուսական օրենքը երրորդ՝ վերջնական ընթերցմամբ ընդունել է մայիսի 14-ի լիագումար նիստում։ Օրինագծին կողմ է քվեարկել 84 պատգամավոր, դեմ՝ 30։

Իշխանությունը հաշվի չի առել միջազգային գործընկերների նախազգուշացումները և երկրում շարունակական զանգվածային բողոքի ակցիաների պահանջը՝ օրենքը անվերապահորեն ետ կանչելու մասին։

Ռուսական օրենքը պարտավորեցնում է որպես «օտարերկրյա գործակալներ» գրանցվել այն անկախ լրատվամիջոցներին և հասարակական կազմակերպություններին, որոնք աշխատում են միջազգային հիմնադրամների դրամաշնորհային աջակցությամբ և որոնց կառավարությունը կամ նրա հետ կապված խմբերը չեն վերահսկում և չեն կարող սահմանափակել քննադատությունը։ Ռուսական օրենքի համաձայն՝ որպես գործակալ գրանցվելուց հրաժարվելու դեպքում նախատեսվում է 25 000 լարի տուգանք և այլ պատժիչ միջոցներ, որոնք կոչնչացնեն անկախ կազմակերպությունները:

«Վրացական երազանքը» օրենքի վերջնական տարբերակում նաև ավելացրել է, որ ֆիզիկական անձինք նույնպես պարտավոր են լինելու պահանջվող տեղեկատվությունը տրամադրել արդարադատության նախարարությանը։ Նախարարությունը կարող է նաև պահանջել տվյալներ՝ կապված անձի քաղաքական հայացքների, կրոնական կամ փիլիսոփայական համոզմունքների, առողջական վիճակի և սեռական կյանքի հետ։ Պահանջվող տեղեկատվությունը չներկայացնելու դեպքում նախատեսված է 5000 լարի տուգանք։

Մայիսի 18-ին նախագահ Սալոմե Զուրաբիշվիլին վետո է դրել ռուսական օրենքի վրա։ Նրա պարզաբանմամբ՝ օրենքը որևէ փոփոխության, բարելավման ենթակա չէ և այն պետք է չեղարկվի։ «Վրացական երազանքը» ծրագրում է հաղթահարել վետոն։