Շուքրութցիները դադարեցրել են հացադուլը, բողոքի ակցիան կշարունակվի մինչև համաձայնության հասնելը

«Պետության ներկայացուցիչը ներգրավված է եղել այս գործընթացներում։ Արդեն հանդիպում է եղել, և մենք պայմանավորվել ենք, որ

ստեղծվելու է աշխատանքային խումբ՝ մեր, ընկերության և պետության ներկայացուցիչների մասնակցությամբ։ Այս խումբը կպատրաստի արդար պայմանագիր։

Այս գործընթացը համակարգելու են էկոնոմիկայի և առողջապահության նախարարությունները։ Հաջորդ հանդիպումը նշանակված է հոկտեմբերի 15-ին, և ավելի մանրամասն կհայտարարվի»,- «Վրաստանի լուրերին» ասել է հանրահավաքի մասնակիցներից Գիորգի Նեպարիձեն։

Հոկտեմբերի 17-ին՝ ժամը 20:00-ին, խորհրդարանի մոտ տեղի կունենա շուքրութցիների համերաշխության հանրահավաք։

Շուքրութիի բնակիչները մարտի 13-ից շարունակական բողոքի ցույց են իրականացնում Ճիաթուրայի Կորոխնալի հանքավայրում։ Մինչ բողոքի ակցիայի մեկնարկը գյուղի մեջտեղում՝ գետնին գրեթե 2 կիլոմետր երկարությամբ ճեղք է առաջացել։ Ճեղքն անցնում է ամբողջ գյուղով, այն ավելի ու ավելի է խորանում, բնակելի տները փլուզվում են։

Քանի որ տուժածները կենտրոնական իշխանության ուշադրությանը չեն արժանացել, ոչ էլ որևէ մեկը արձագանքել է «Ջորջիան Մանգանեզի» անվերահսկելի գործունեությանը, սեպտեմբերի 1-ից ակցիայի 5 մասնակից կարել են իրենց բերանները։ Սեպտեմբերի 11-ին բողոքի ակցիան տեղափոխվել է Թբիլիսի՝ խորհրդարանի շենքի դիմաց, որտեղ հացադուլ է հայտարարել 12 մարդ, այդ թվում կանայք։ Հանրահավաքի մասնակիցները 24 ժամ հավաքված են բաց երկնքի տակ, նույնիսկ հորդառատ անձրևի ժամանակ, քանի որ ՆԳՆ-ն թույլ չի տվել վրան տեղադրել, և դատարանը, օրենքով սահմանված ժամկետում ըստ էության չի քննում այն հայցը, որով Շուքրութցիները պահանջում են ՆԳՆ-ին չմիջամտել վրանի տեղադրմանը։

«Ջորջիան Մանգանեզը» ակցիայի մասնակիցներին և նրանց հարազատներին դատի է տվել պահանջում է, որ նրանք վճարեն 5․5 մլն լարի որպես վնասի փոխհատուցում և միևնույն ժամանակ, առաջին իսկ պահանջով, իրենց բակերն ու հողամասերը ազատված վիճակում հանձնեն ընկերությանը, այսինքն՝ քանդված կամ վտանգի տակ գտնվող տները պետք է քանդեն, մաքրեն և հանձնեն ընկերությանը։ Դատարանը արգելանք է կիրառել ցուցարարների և նրանց հարազատների ունեցվածքի նկատմամբ։ Բողոքի ակցիային մասնակցած բոլոր անձինք, ովքեր աշխատում էին «Ջորջիան Մանգանեզում» կամ նրա հիմնած ընկերություններում և կապալառուներում, ազատվել են աշխատանքից։

«Ջորջիան Մանգանեզ» ՍՊԸ-ն Ճիաթուրայի մունիցիպալիտետում 2007 թվականից զբաղվում է մանգանի արդյունահանմամբ։ Ինչպես Շուքրութի գյուղում, այնպես էլ հարակից բնակավայրերում էկոլոգիական աղետին հավասար իրավիճակ է ստեղծվել։ Իրավիճակն էլ ավելի վատացավ 2017 թվականից հետո, երբ «Վրացական երազանքի» կառավարությունն ընկերությունում նշանակեց հատուկ մենեջեր, որը մինչ օրս կառավարում է ձեռնարկությունը։