«Վրացական երազանքը» բացառում է Սաակաշվիլիի հարցով խորհրդակցությունների անցկացումը

«Ինչ վերաբերում է մեր հարաբերությունները շարունակելուն, մենք պատրաստ ենք բոլոր դեպքերում մնալ միակողմանի բարեկամության ռեժիմում մի պարզ պատճառով. մեկն այն է, որ մենք պետք է հարգենք Վրաստանի և Ուկրաինայի ժողովուրդների դարավոր բարեկամությունը, իսկ երկրորդը՝ այս երկիրը՝ Ուկրաինան ներկայում պատերազմական վիճակում է։ Սա է միակ պատճառը, թե ինչու մենք պետք է մնանք միակողմանի բարեկամության ռեժիմում, նույնիսկ ուկրաինական իշխանությունների հետ՝ չնայած ձեռնարկված հարձակողական քայլերին։ Իհարկե, Սաակաշվիլիի հարցով ոչ մի խորհրդակցություն չի կարող սկսվել։ Սաակաշվիլիի հարցով խորհրդակցությունները բացառված են»,- այսօր լրագրողներին ասել է Կոբախիձեն։

Իշխող կուսակցության նախագահը նշել է, որ Ուկրաինայի հաջորդ քայլերը՝ արդեն իսկ արված քայլերի ֆոնին, այլևս հետաքրքիր չեն։

Հուլիսի 3-ին Թբիլիսիի քաղաքային դատարանի նիստում Միխեիլ Սաակաշվիլիի հայտնվելուց հետո Ուկրաինայի նախագահ Վլադիմիր Զելենսկին հայտարարել է, որ Ռուսաստանը Վրաստանի իշխանությունների ձեռքով սպանում է Ուկրաինայի քաղաքացուն։ Նա պաշտոնական Թբիլիսիին կոչ է արել «դադարեցնել այս վիրավորանքը և համաձայնել Սաակաշվիլիի վերադարձին Ուկրաինա»։

Հուլիսի 4-ին Զելենսկիի հանձնարարականով Ուկրաինայի արտաքին գործերի նախարարություն է կանչվել Վրաստանի դեսպան Գիորգի Զաքարաշվիլին, ում խիստ բողոք է արտահայտվել Միխեիլ Սաակաշվիլիի առողջական վիճակի «էական վատթարացման» պատճառով։ Վրացի դիվանագետին ասել են, որ «նման վերաբերմունքը Միխեիլ Սաակաշվիլիի նկատմամբ բացարձակապես անընդունելի է», և «Վրաստանի իշխանությունները պետք է դադարեն վիրավորել Ուկրաինայի քաղաքացուն»։

«Այս կապակցությամբ Ուկրաինայում Վրաստանի դեսպան Գիորգի Զաքարաշվիլիին առաջարկվել է վերադառնալ Թբիլիսի խորհրդակցությունների՝ իրավիճակի կարգավորման ուղիներ որոնելու համար։ Ուկրաինական կողմն ընդգծել է, որ պատրաստ է շտապ քննարկել Միխեիլ Սաակաշվիլիին բուժման և խնամքի նպատակով Ուկրաինա տեղափոխելու հարցը»,- հայտնել են Ուկրաինայի արտաքին գործերի նախարարությունից։

Գիորգի Զաքարաշվիլիին Ուկրաինայից հեռանալու համար տրվել է 48 ժամ ժամանակ։ Վրաստանի արտաքին գործերի նախարարությունը ուկրաինական կողմի որոշումը գնահատել է որպես դիվանագիտական ​​հարաբերությունների սրման ծայրահեղ ձև։ Նախարարության տվյալներով՝ Մարդու իրավունքների եվրոպական դատարանը «վերջ է տվել դատապարտյալ Միխեիլ Սաակաշվիլիի առողջական վիճակի մասին շահարկումներին»։ Ըստ այդմ, պաշտոնական Կիևի որոշումը վրացական կողմի համար մնում է անհասկանալի։