“Gürcü Arzusu”nun fəxri sədri, milyarder Bidzina İvanişvili futbol üzrə milli komandaya vəd etdiyi 30 milyon larini artıq verib. Bu barədə Gürcüstanın baş naziri məlumat verib. İrakli Kobaxidzenin sözlərinə görə, yığmanın futbolçularının növbəti oyunda qalib gəlmələri də eyni məbləğlə mükafatlandırılacaq.
Əsas xəbərlər
“Əlbəttə, ümumiyyətlə, futbolçularımıza əlavə motivasiya yaratmağa ehtiyac yoxdur, lakin cənab Bidzina İvanişvilinin futbol komandasına göstərdiyi dəstək çox vacibdir, çox dəyərlidir. Bu mükafat əlavə motivasiya yaradacaq.
Komanda qrupdan çıxmaq üçün nəzərdə tutulan ilk 30 milyonu artıq alıb və komandanın futbolçuları ilə görüşəndə növbəti oyunun da bu cür mükafatlandırılacağını xatırlatdıq.
Bu daha çox motivasiya yaradacaq. Bir daha deyirəm, futbolçuların əlavə motivasiyaya ehtiyacı yoxdur, onlarda ruh yüksəkdir və növbəti oyunda da qalib gəlmək arzusu var”, - deyə Kobaxidze jurnalistlərə bildirib.
Baş nazirin sözlərinə görə, İspaniyaya qarşı qələbə mümkündür: “İspaniya çempionatın favoritlərindən biri olsa da, hər şey mümkündür. Oğlanlar sübut etdilər ki, istənilən rəqibə qarşı oynaya bilərlər. Portuqaliya İspaniyadan heç də geri qalmırdı. Ona görə də ayın 30-da hər şey mümkündür”.
Avropa çempionatının debütantı Gürcüstan yığması Türkiyə, Çexiya və Portuqaliya ilə birlikdə F qrupunda mübarizə aparırdı. İyunun 26-da Almaniyanın Qelzenkirşen şəhərində baş tutan həlledici üçüncü görüşdə Xviça Kvaratsxelia və Qiorqi Mikautadze portuqaliyalıların qapısına iki qol vurub. Qarşılaşma 2:0 hesabı ilə başa çatıb. Buna qədər isə Gürcüstan Çexiya ilə heç-heçə edib və ümumilikdə 4 xalla qrupdan çıxıb. Qeyd edək ki, yığma qrup mərhələsində 12,25 milyon avro qazanıb ki, bu da təxminən 37 milyon laridir.
İyunun 30-da 1/8 finalda Gürcüstan İspaniya ilə qarşılaşacaq. Oyunun Kölndə oynanılması planlaşdırılır.
Aprelin 23-də, tarixi qələbədən və Avropa çempionatına vəsiqədən təxminən bir ay sonra Bidzina İvanişvili milli futbol komandasına qrupdan çıxması təqdirdə 30 milyon lari vəd edib. İvanişvili hər növbəti matçda alınacaq qalibiyyətə görə də eyni məbləğdə mükafat vədi verib. Vəddən əvvəl milli komandanın oyunçuları rus qanunu əleyhinə və Gürcüstanın Avropaya inteqrasiyasını dəstəkləyən bəyanatlarla çıxış etmişdilər.
