Tbilisidə Rusiya vətəndaşlarının Avropaya uçması üçün dördüncü tranzit qovşağı yaradılır. Bu barədə Rusiya mətbuatına Moskvanın Vnukovo Beynəlxalq Hava Limanının və “Azimut” aviaşirkətinin şəriki Vitali Vantsev məlumat verib.
Əsas xəbərlər
“Georgian Airways”dən olan tərəfdaşlarımız rus sərnişinlər üçün tranzit baxımından yaxşı təkliflər irəli sürür, Avropaya - birbaşa uçuşların qapalı olduğu istiqamətlərə, Paris, Nitsa və Romaya reyslər açır.
Nəhayət, Rusiya vətəndaşları İstanbul, İrəvan və Bakıdan sonra Tbilisidə dördüncü yaxşı tranzit mərkəzinə sahib olacaqlar. Biz və “Georgian Airways” onu [habı] elə təşkil etməyə çalışırıq ki, sərnişinlərimiz üçün mümkün qədər rahat olsun, köçürülməyə bir saat yarım kimi uzun müddət lazım gəlməsin”, - Vantsev bildirib.
Rusiyanın “Azimut” və Gürcüstanın “Georgian Airways” aviaşirkətləri mayın sonundan bu yana Moskva ilə Tbilisi arasında uçuşlar həyata keçirir. Əvvəlcə aviaşirkətlər gündə bir reys həyata keçirirdisə, iyulun 5-dən etibarən “Azimut” gündə iki dəfə uçur, iyulun 6-dan isə “Georgian Airways” həftədə dörd yeni reys əlavə edib. Bundan əlavə, “Georgian Airways” Tbilisi üzərindən Moskvadan Nitsaya tranzit uçuşlara da başlayıb.
Gürcüstanın beynəlxalq tərəfdaşları Rusiya ilə Gürcüstan arasında birbaşa uçuşların bərpasına narahatlıqla müşahidə edirlər. ABŞ-ın Gürcüstandakı səfiri Kelli Deqnan “Gürcüstan Xəbərləri”nə müsahibəsində qeyd edib ki, birbaşa uçuşlar Rusiya vətəndaşlarına Avropaya çıxış imkanı verir, çünki Avropa Rusiya vətəndaşları üçün öz hava məkanını bağlayıb.
“Birbaşa uçuşlar onlara Avropaya doğru açılan arxa qapıları açır. Yenə və yenə də, Rusiya vətəndaşlarının, onların hökumətinin müharibəyə başlamağı seçdiyinə görə təcrid olunduqlarını başa düşmələri vacibdir... ona görə də onlara Tbilisiyə birbaşa uçuşlara, sonra isə Fransaya və ya Almaniyaya səfər imkanı vermək Rusiya vətəndaşlarını hər şeyin normal olduğunu düşünməyə vadar edəcək. Bu normal deyil. Keçən 75 il ərzində bizim hamımızın yaratmaq üçün çox şey etdiyi sülhü və sabitliyi məhv edən onların hökumətidir”, - Kelli Deqnan bildirib.
Rusiya ilə birbaşa uçuşları bərpa etdiyi üçün Ukrayna hakimiyyəti “Georgian Airways” və onun prezidenti Tamaz Qaiaşviliyə sanksiya tətbiq edib.
