პრემიერ-მინისტრმა ირაკლი კობახიძემ განაცხადა, რომ რუსული კანონის მიღება არა თუ საფრთხეს არ შეუქმნის საქართველოს ევროინტეგრაციას, არამედ პირიქით, მისი მიღება „არის აუცილებელი პირობა იმისთვის, რომ ევროინტეგრაციის გზაზე წინ წავიწიოთ“. ეს მაშინ, როდესაც ევროკავშირის ლიდერები გვაფრთხილებენ - რუსული კანონი არ შეესაბამება ევროკავშირის ღირებულებებს და მისი მიღება „უარყოფითად იმოქმედებს ევროკავშირის გზაზე საქართველოს პროგრესზე“.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 6 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
„ამ კანონზე გვეუბნებიან, რომ არის ცუდი, ჩვენ გავიტანთ სიმართლეს და გაიხსნება მოლაპარაკებები. ჩვენ რომ ბოლომდე გავიტანეთ ყველაფერი, ამიტომ მოგვენიჭა კანდიდატის სტატუსი“, - განაცხადა დღეს კობახიძემ.
პრემიერ-მინისტრი ასევე გამოეხმაურა ევროკავშირის უმაღლესი წარმომადგენლის, ჯოზეფ ბორელის გუშინდელ განცხადებას, რომლის მიხედვითაც, რუსული კანონი ევროპულ ღირებულებებთან შეუსაბამოა და მისი ხელახლა ინიცირებით „ქართულმა ოცნებამ“ ნაკისრი ვალდებულება არ შეასრულა. კობახიძემ თქვა, რომ ბორელი ქვეყნის შიდა საქმეებშია ჩართული.
„დღეს ჯოზეფ ბორელი არის ჩართული იმ პოლიტიკურ დებატებში, რომელიც ქვეყნის შიგნით უნდა წარმოებდეს. არის კანონი განსახილველი და რას ითვალისწინებს დემოკრატიული პროცესი? კანონზე მსჯელობენ პოლიტიკური პარტიები პარლამენტში და არა ვიღაც გარედან, მათ შორის, თუნდაც პარტნიორი და მეგობარი. როგორ წარიმართება დემოკრატიული პროცესი? ყველა ქვეყანაში ასეა - არის პარლამენტი, არის უმრავლესობა და ოპოზიცია. როდესაც დისკუსია წარიმართება კანონთან დაკავშირებით, ოპოზიციამ კეთილი უნდა ინებოს და დაამტკიცოს, რომ კანონი არ არის კარგი“.
„ქართული ოცნება“ 29 აპრილს, რუსული კანონის მხარდასაჭერად „საყოველთაო-სახალხო შეკრებას“ მართავს პარლამენტის შენობის წინ, ზუსტად იმავე ადგილზე, სადაც ერთი კვირაა ყოველდღიურად იმართება აქციები რუსული კანონის საწინააღმდეგოდ. რუსული კანონის მხარდამჭერ აქციაში მონაწილეობას ავალდებულებენ საჯარო სამსახურებში დასაქმებულებს. ირაკლი კობახიძის თქმით, „ყველა დაინახავს, რამხელაა მხარდაჭერა მმართველი გუნდის მიმართ“.
