აფხაზ ე.წ. ოპოზიციონერ ლევან მიქაას რუსეთის მოქალაქეობა ჩამოერთვა

ლევან მიქაა აქტიურად მონაწილეობდა ოკუპირებულ აფხაზეთში, 2024 წლის ნოემბერში დაწყებულ აქციებში, როდესაც ე.წ. ოპოზიციამ და მისმა მხარდამჭერებმა ჯერ დე ფაქტო პარლამენტის, შემდეგ მინისტრთა კაბინეტისა და პრეზიდენტის ადმინისტრაციის შენობები დაიკავეს. აქციებს ე.წ. პრეზიდენტის, ასლან ბჟანიას გადადგომა და ვადამდელი საპრეზიდენტო არჩევნების დანიშვნა მოჰყვა.

საპროტესტო აქციები სოხუმში დაიწყო მას შემდეგ, რაც დე ფაქტო პარლამენტმა ინვესტიციების შესახებ რუსეთთან გაფორმებული ე.წ. შეთანხმების რატიფიცირება გადაწყვიტა. ე.წ. ოპოზიცია მიიჩნევს, რომ დოკუმენტის ძალაში შესვლის შემთხვევაში, რუსული კომპანიები დე ფაქტო რესპუბლიკაში ბინების მშენებლობას დაიწყებენ, „შეთანხმებით“ გათვალისწინებული შეღავათების პირობებში გაფართოვდება რუსული ბიზნესი, რაც ზიანს მიაყენებს ადგილობრივ მცირე და საშუალო მეწარმეებს, პირველ რიგში კი, ტურიზმის სფეროს, რომელზეც არაღიარებული რესპუბლიკის ბიუჯეტის შემოსავლების თითქმის მესამდი მოდის.

„როდესაც ვამბობთ, რომ რუსეთთან ჩვენს ასიმეტრიულ ურთიერთობებში არ შეგვიძლია გავხსნათ ჩვენი საცხოვრებელი ბაზარი, იმიტომ, რომ მცირერიცხოვანი ერი ვართ და რომ საცხოვრებელი ბაზრის გახსნის შემთხვევაში, ჩვენ დავკარგავთ ჩვენს იდენტობას, ჩვენს ენას, ჩვენს კულტურას და უბრალოდ გავქრებით, ეს ნორმალურად უნდა იქნეს მიღებული და ეს სამართლიანია“, - აცხადებდა ლევან მიქაა ერთ-ერთ ინტერვიუში.

2024 წლის 3 დეკემბერს ე.წ. პარლამენტმა რუსეთთან საინვესტიციო შეთანხმების რატიფიცირების წინააღმდეგ მისცა ხმა. იანვარში გავრცელდა ინფორმაცია, რომ რუსეთის მოქალაქეობა ჩამოერთვა ე.წ. ოპოზიციონერ დეპუტატს, კან კვარჩიას, რომელიც „შეთანხმებას“ კაბალურს უწოდებდა და აცხადებდა, რომ მისი რატიფიცირება არ შეიძლებოდა.