ეუთოს ადამიანის უფლებათა ოფისი „ქართული ოცნების“ უცხოეთის აგენტების კანონს აკრიტიკებს

2 აპრილს გამოქვეყნებულ განცხადებაში ნათქვამია, რომ ახალი კანონი ფიზიკურ პირებისა და ორგანიზაციებისგან, რომლებიც მიიჩნევიან, რომ უცხოური სუბიექტის ინტერესებში მოქმედებენ, მაგალითად, უცხოური დაფინანსების გამო, მოითხოვს უცხოელ აგენტებად დარეგისტრირდნენ და სანქციებს აწესებს ამ კანონის მოთხოვნების შეუსრულებლობის გამო.

„ეს კანონი ძირეულ გავლენას ახდენს სამოქალაქო საზოგადოების საქმიანობაზე და ყველა იმ პირზე, ვინც ადამიანის უფლებების დაცვაზე მუშაობს. სამოქალაქო საზოგადოება სასიცოცხლოდ მნიშვნელოვანია ყველა დემოკრატიისთვის და ნებისმიერმა ახალმა მოთხოვნამ, შეზღუდვების დაწესების ნაცვლად, უნდა გააძლიეროს მათი მნიშვნელოვანი საქმიანობა“, – განაცხადა ODIHR-ის დირექტორმა, მარია ტელალიანმა.

ODIHR-ი აღნიშნავს, რომ ახლად მიღებული კანონი მიზნად ისახავს გასულ წელს მიღებული „უცხოური გავლენის გამჭვირვალობის შესახებ“ კანონის ჩანაცვლებას იმ შეშფოთების ფონზე, რომ ის შეაფერხებს გაერთიანების, მშვიდობიანი შეკრების და გამოხატვის თავისუფლებას.

„აშშ-ის „უცხოელი აგენტების რეგისტრაციის აქტს“, რომელზეც საქართველოს ახალი კანონია დაფუძნებული, აქვს სამართლებრივი გარანტიები, რომლებიც ხელს უშლის სამოქალაქო საზოგადოების უცხოური გავლენის ინსტრუმენტად მონიშვნას მხოლოდ უცხოეთიდან მიღებული დაფინანსების გამო. ამის ნაცვლად, ის ცდილობს, უზრუნველყოს, რომ კერძო კომპანიები ან არაკომერციული ორგანიზაციები, რომლებიც უცხოური ძალების სახელით მონაწილეობენ ადვოკატირების ძალისხმევაში ან ლობირებაში, დარეგისტრირდნენ სახელისუფლო ორგანოებში და ეს ინფორმაცია საჯაროდ იყოს ხელმისაწვდომი.

კანონმდებლობის ერთი ქვეყნიდან მეორეში გადმოტანას ყოველთვის სიფრთხილით უნდა მივუდგეთ და იგი უნდა განიხილებოდეს უფრო ფართო ეროვნული ინსტიტუციური და სამართლებრივი ჩარჩოს კონტექსტში.

ODIHR საქართველოს ხელისუფლებას მოუწოდებს, გადახედოს ამ საკანონმდებლო ინიციატივის განხორციელებას და იმეორებს კანონის დეტალური გადაფასების აუცილებლობას“, – დემოკრატიული ინსტიტუტებისა და ადამიანის უფლებათა ოფისი გამოთქვამს მზადყოფნას, დაეხმაროს საქართველოს ამ სფეროში საკანონმდებლო ბაზის გაუმჯობესებაში.

ამასთან, განცხადებაში აღნიშნულია, რომ ეუთოს ყველა მონაწილე სახელმწიფოს აღებული აქვს ვალდებულება, დაიცვას შეკრების, გაერთიანებისა და გამოხატვის თავისუფლების უფლებები, როგორც კანონის დონეზე, ისე პრაქტიკაში.

„მათ ასევე აღიარებული აქვთ სამოქალაქო საზოგადოების მნიშვნელობა ადამიანის უფლებების, დემოკრატიისა და კანონის უზენაესობის ხელშეწყობისთვის. მიუხედავად იმისა, რომ ლობისტური საქმიანობის რეგულირება მნიშვნელოვანი ინსტრუმენტია საჯარო გადაწყვეტილებების მიღების გამჭვირვალობისა და სამართლიანობის უზრუნველსაყოფად, ასევე, კორუფციის თავიდან ასაცილებლად, მან პატივი უნდა სცეს ამ უფლებებს და არ ხელყოს პოლიტიკური და საზოგადოების მონაწილეობა“, – ვკითხულობთ განცხადებაში.

„ქართული ოცნების“ პარლამენტმა „უცხოეთის აგენტების რეგისტრაციის აქტი“ მესამე, საბოლოო მოსმენით 1-ელ აპრილს მიიღო, რის შემდეგაც მას ხელი ამავე პარტიის მიერ არჩეულმა პრეზიდენტმა, მიხეილ ყაველაშვილმა მოაწერა და 2 აპრილს საკანონმდებლო მაცნეში გამოქვეყნდა. ახალი კანონი ძალაში გამოქვეყნებიდან მე-60 დღეს შევა და მის აღსრულებაზე პასუხისმგებელი ანტიკორუფციულ ბიურო იქნება. კანონის დარღვევა დაისჯება ჯარიმით ან თავისუფლების აღკვეთით ვადით 5 წლამდე.