თბილისის სააპელაციო სასამართლომ არ დააკმაყოფილა ტელეკომპანია „პირველის“ სარჩელი და პირველი ინსტანციის მიერ ე.წ. ცილისწამების საქმეზე პრემიერ-მინისტრ ირაკლი კობახიძის დედის სასარგებლოდ მიღებული გადაწყვეტილება უცვლელი დატოვა.
ახალი ამბები
მკითხველის რჩეული
- 1 „ცოლად შერთვის მიზნით გაიტაცა და სექსუალურად იძალადა“ - კახეთის პოლიციამ 5 პირი დააკავა
- 2 სამტრედიაში ნიკა მელიას თავს დაესხნენ
- 3 კობახიძემ დააკონკრეტა რომელი ოპოზიციური პარტიების აკრძალვას გეგმავს „ქართული ოცნება“
- 4 შოვის სტიქიაზე ახალი კვლევის გამოქვეყნების შემდეგ ლაშა სუხიშვილი გამოკითხვაზე დაიბარეს
- 5 გაეროში რუსეთის წარმომადგენელმა აგვისტოს ომზე „ქართული ოცნების“ განცხადება გაიმეორა
- 6 მწვერვალ შხელდაზე დაღუპული მთამსვლელის, არჩილ ბადრიაშვილის ცხედარი იპოვეს
სააპელაციო სასამართლოს მოსამართლეთა კოლეგიამ (ოთარ სიჭინავა, გოჩა ჯეირანაშვილი, ლაშა თავართქილაძე) გადაწყვეტილება დღეს, 5 მარტს გამოაცხადა.
„სააპელაციო სასამართლომ კიდევ ერთხელ უკანონოდ შეზღუდა მედიის გამოხატვის თავისუფლება და მაუწყებლის ვალდებულება, საზოგადოებას მიაწოდოს საგამოძიებო ჟურნალისტური პროდუქტი იმისთვის, რომ იყოს ინფორმირებული იმ საკითხებთან დაკავშირებით, სადაც შეიძლება იკვეთებოდეს სავარაუდო უკანონობა.
რამდენიმე შეცდომას ჰქონდა ადგილი, მათ შორის არის სარჩელის დაგვიანებით შეტანა, ხანდაზმულობის ვადის და ინსტიტუტის უგულებელყოფა როგორც მოსარჩელის, ასევე სასამართლოს მხრიდან. როგორც ჩანს, აბსურდული მსჯელობა იმასთან დაკავშირებით, რომ „ტვ პირველს“ უნდა ემტკიცებინა, მოსარჩელე თამარ ზაალიშვილმა როდის ნახა სიუჟეტი, გაიზიარა სააპელაციო სასამართლომაც, რაც არის სრულად ალოგიკური. ეს საფრთხეს შეუქმნის სხვა საქმეებსაც, სადაც ხანდაზმულობის ინსტიტუტი გამოყენებულია როგორც ბერკეტი საკუთარი ინტერესების დასაცავად“, - განაცხადა ტელეკომპანიის ადვოკატმა, თორნიკე მიგინეიშვილი.
ტელეკომპანია „პირველი“ სააპელაციო სასამართლოს გადაწყვეტილებას უზენაეს სასამართლოში გაასაჩივრებს.
დავა ეხება გადაცემაში „ნოდარ მელაძის შაბათი“ გასულ რეპორტაჟს - „ყალბი დიპლომები სარდაფიდან“. თეატრალური უნივერსიტეტის დეკანის ყოფილი მოადგილე მარინე მიქაუტაძე ყალბ დოკუმენტებზე ხელმოწერაში ადანაშაულებდა ირაკლი კობახიძის დედას, თამარ ზაალიშვილს, რომელიც განათლების სამინისტროს ხარისხის კონტროლის ცენტრის დირექტორის მოადგილე იყო.
თამარ ზაალიშვილმა სასამართლოში იჩივლა და ამტკიცებდა, რომ სიუჟეტში მისი პატივის, ღირსებისა და საქმიანი რეპუტაციის შემლახველი, ცილისმწამებლური განცხადება გავიდა. 2022 წლის 20 სექტემბერს თბილისის საქალაქო სასამართლოს მოსამართლე თინა ვაშაყმაძემ თამარ ზაალიშვილის სარჩელი დააკმაყოფილა და მორალური ზიანის ანაზღაურების მიზნით, ტელეკომპანიას 5555 ლარის, ხოლო ჟურნალისტ მაკა ჩიხლაძეს და პროდიუსერ ნოდარ მელაძეს 5-5 ლარის გადახდა დააკისრა. გარდა ამისა, მათ რეპორტაჟში გასული „ცრუ ინფორმაციის“ უარყოფაც დაევალათ. თამარ ზაალიშვილის სასარგებლოდ 5555 ლარის გადახდა დაეკისრა მარინე მიქაუტაძესაც.
საქალაქო სასამართლოს გადაწყვეტილება ტელეკომპანია „პირველმა“ სააპელაციო სასამართლოში გაასაჩივრა. არხის იურისტების შეფასებით, თამარ ზაალიშვილს სარჩელი უსაფუძვლო იყო და მომჩივანმა ის ხანდაზმულობის ვადის დარღვევით წარადგინა. „სიტყვისა და გამოხატვის თავისუფლების შესახებ“ საქართველოს კანონის მიხედვით, ცილისწამების შესახებ სარჩელი სასამართლოში წარდგენილი უნდა იქნეს 100 დღის განმავლობაში მას შემდეგ, რაც პირი გაეცნო ან შეეძლო, რომ გასცნობოდა განცხადებას. სადავო სიუჟეტი ტელეკომპანია „პირველის“ ეთერში 2021 წლის 10 ივლისს გავიდა. შესაბამისად, სარჩელის წარდგენის ხანდაზმულობის ვადა 18 ოქტომბერს ამოიწურა, თამარ ზაალიშვილის სარჩელი კი 2022 წლის 12 იანვრით თარიღდებოდა.
