20 ოქტომბერს მოლდოვაში ჩატარებული საპრეზიდენტო არჩევნების წინასწარი შედეგების მიხედვით, ამომრჩეველთა ხმების 50%-ზე მეტი ვერცერთმა კანდიდატმა ვერ მიიღო. მეორე ტურში მოქმედი პროევროპელი პრეზიდენტი მაია სანდუ და მისი მთავარი კონკურენტი, ყოფილი გენერალურ პროკურორი ალექსანდრ სტოიანოღლო გადადიან.
ახალი ამბები
მკითხველის რჩეული
- 1 მოროდიორი „კადიროველები“ ნიღბიან დამრბევებს შორის თბილისში - რედაქტორის სვეტი
- 2 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 3 სპეცრაზმი რუსთაველის გამზირზე აქციის მონაწილეებს არბევს
- 4 „ქართული ოცნების“ დე-ფაქტო მთავრობა არალეგიტიმურია - ჰელსინკის კომისია
- 5 აქციაზე ტელეკომპანია „პირველის“ ჟურნალისტი მარიამ გაფრინდაშვილი დაშავდა
- 6 აშშ-მა საქართველოსთან სტრატეგიული პარტნიორობა შეაჩერა
ამ დროისთვის ცენტრალურმა საარჩევნო კომისიამ ხმების 98.51% დაითვალა. მაია სანდუს ამომრჩეველთა 42.07%-ის (640 881 ამომრჩეველი) მხარდაჭერა აქვს, ხოლო ალექსანდრ სტოიანოღლოს - 26.27%-მა (400 208 ამომრჩეველი) მისცა ხმა. არჩევნების პირველ ტურში 11 კანდიდატი მონაწილეობდა.
საპრეზიდენტო არჩევნების დღეს ასევე ჩატარდა რეფერენდუმი მოლდოვის ევროკავშირში გაწევრიანების შესახებ. წინასწარი მონაცემებით, ამომრჩეველთა 50.16%-მა (735 834 ამომრჩეველი) ხმა ევროინტეგრაციას მისცა, ხოლო 49.84%-მა (731 123 ამომრჩეველი) სარეფერენდუმო კითხვას „მხარს უჭერთ თუ არა კონსტიტუციის ცვლილებას მოლდოვის რესპუბლიკის ევროკავშირში გაწევრიანების მიზნით?“ უპასუხა „არა“.
„მოლდოვა ჩვენი ქვეყნის თავისუფლებასა და დემოკრატიაზე უპრეცედენტო თავდასხმის წინაშეა“, - განაცხადა მაია სანდუმ კიშინიოვში, რეფერენდუმის წინასწარი შედეგების კომენტირებისას. მან ჩარევაში დაადანაშაულა „ეროვნული ინტერესებისადმი მტრულ უცხო ძალებთან მომუშავე კრიმინალური ჯგუფები“.
„ჩვენ გვაქვს მკაფიო მტკიცებულება იმისა, რომ ეს დანაშაულებრივი დაჯგუფებები 300 000 ხმის მოსყიდვას ისახავდნენ მიზნად, რაც უპრეცედენტო მასშტაბის თაღლითობაა. მათი ამოცანა იყო დემოკრატიული პროცესის შელახვა. განზრახული აქვთ საზოგადოებაში შიშის და პანიკის გავრცელება. ჩვენ უკან არ დავიხევთ დემოკრატიისა და თავისუფლების დაცვაში. ველოდებით საბოლოო შედეგებს და მტკიცე გადაწყვეტილებით გავცემთ პასუხს“, - თქვა სანდუმ.
არჩევნებსა და რეფერენდუმზე აქტივობამ მთლიანობაში 51%-ს გადააჭარბა, რაც იმას ნიშნავს, რომ მონაწილეობა რესპუბლიკის მილიონნახევარზე მეტმა მოქალაქემ მიიღო. ამომრჩევლებმა ხმა 2219 საარჩევნო უბანზე მისცეს. აქედან 1988 მოლდოვის რესპუბლიკის ტერიტორიაზე იყო გახსნილი, ხოლო 231 ქვეყნის ფარგლებს გარეთ, 37 ქვეყანაში .
