რუსეთმა უკრაინის ანექსირებულ ტერიტორიებზე - დონეცკის, ლუგანსკის, ხერსონისა და ზაპოროჟიეს ოლქებში საომარი მდგომარეობა გამოაცხადა. პრეზიდენტმა პუტინმა ამ გადაწყვეტილების შესახებ უშიშროების საბჭოს სხდომაზე თქვა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„უკრაინული სპეცსამსახურები ჩვენს ტერიტორიაზე დივერსიულ ჯგუფებს აგზავნიან. მათ მიერ არის ორგანიზებული ყირიმის ხიდის აფეთქებაც. ასევე, ტერაქტები სხვადასხვა რეგიონში, მათ შორის, საზოგადოების თავშეყრის ადგილებშიც. ეს ასევე სატრანსპორტო ზონებს, ენერგეტიკულ და ატომური ენერგეტიკის ობიექტებსაც ეხება. შეგახსენებთ, რომ დონეცკისა და ლუგანსკის სახალხო რესპუბლიკებში, ასევე, ხერსონისა და ზაპოროჟიეს ოლქებში, რუსეთის შემადგენლობაში შესვლამდე საომარი მდგომარეობა მოქმედებდა. ახლა აუცილებელია ეს რეჟიმი რუსული კანონმდებლობის შესაბამისად გავაფორმოთ. ხელი მოვაწერე განკარგულებას, რომლის მიხედვითაც რუსეთის ამ ოთხ ტერიტორიულ სუბიექტზე საომარ მდგომარეობას ვაცხადებთ“, - განაცხადა ვლადიმერ პუტინმა.
უშიშროების საბჭოს სხდომაზე სიტყვით გამოსვლისას პუტინმა მინისტრთა კაბინეტსა და მის ხელმძღვანელს მიხეილ მიშუსტინს სპეციალური საკოორდინაციო საბჭოს შექმნა დაავალა, რომელიც რუსეთს, უკრაინაში დაწყებული „სპეციალური სამხედრო ოპერაციის“ მიზნების მიღწევაში დაეხმარება.
უკრაინის დროებით ოკუპირებულ დონეცკის, ლუგანსკის, ხერსონისა და ზაპოროჟიეს ოლქებში, რუსეთმა 23-27 სექტემბერს ფსევდორეფერენდუმები ჩაატარა, 30 სექტემბერს კი ეს ოლქები რუსეთის ტერიტორიულ სუბიექტებად გამოაცხადა. 3 ოქტომბერს, რუსეთის სათათბირო ორგანომ „რეფერენდუმის“ შედეგებისა და უკრაინის ტერიტორიების ანექსიის შესახებ დოკუმენტების რატიფიცირება მოახდინა.
რუსეთმა უკრაინაში სრულმასშტაბიანი ომი 2022 წლის 24 თებერვალს დაიწყო. პუტინი უკრაინის წინააღმდეგ ე.წ. სპეციალური სამხედრო ოპერაციის დაწყების ერთ-ერთ მიზეზად უკრაინის NATO-ში გაწევრიანების სურვილს ასახელდებდა. აგვისტოს ბოლოს რუსეთის ფედერაციის უშიშროების საბჭოს თავმჯდომარის მოადგილემ, დმიტრი მედვედევმა განაცხადა, რომ NATO-ში შესვლაზე უარის თქმა აღარ წარმოადგენდა უკრაინაში ომის შეწყვეტისთვის საკმარის პირობას.
