Բոլորը գիտեն, որ գործակալ չի նշանակում լրտես. Կոբախիձեն՝ «Ժողովրդի ուժի» օրինագծի մասին

«Եթե կոնկրետ ՀԿ-ի կամ այլ կազմակերպության ֆինանսները մարդկանց համար թափանցիկ են դառնում, սա պատի՞ժ է։ Հիմա կուսակցությունները պատժվու՞մ են սեփական միջոցները հայտարարագրելու համար։ Օրինակ, եթե վերցնում ենք քաղաքական կուսակցություն, ամեն տարի հայտարարագիր ենք ներկայացնում աուդիտորական ծառայությանը, և կուսակցության ծախսած յուրաքանչյուր թեթրի, ինչ եկամուտ էլ ունենք, հայտնի է հանրությանը։ Սա հո պատիժ չէ՞։ Դա պայմանավորված է նրանով, որ կուսակցությունները լուրջ ազդեցություն ունեն հասարակության մեջ, քաղաքական կյանքում, և, հետևաբար, հասարակությունը պետք է իմանա, թե ով է կանգնած այս կամ այն ​​կուսակցության հետևում, այդ թվում՝ ֆինանսավորման առումով։ Նույնը կարելի է ասել ՀԿ-ների մասին։ Հարցրեք ցանկացած քաղաքացու, և ոչ ոք ձեզ չի ասի, թե իրականում ով է ֆինանսավորում այս կամ այն ​​լրատվամիջոցին։

Ինչ վերաբերում է բուն տերմինին, ապա վրացական օրենսդրությամբ և ընդհանրապես բոլորին է հայտնի, որ գործակալ չի նշանակում լրտես։

Վրաստանի օրենսդրության համաձայն՝ լրտեսությունն է պատժելի, այսինքն՝ չի օգտագործվում այնպիսի տերմին, ինչպիսին է «գործակալական գործունեություն»։ Լրտեսությունը մի բան է, իսկ ինչ-որ մեկի կամ ինչ-որ բանի գործակալ լինելը՝ մեկ այլ բան։ Գործակալ նշանակում է, որ դու ինչ-որ մեկի շահի կրողն ես, ոչ թե լրտես։ Կարող է լինել մեկ այլ տերմին, բայց այդ տերմինից կախվել չի ստացվի:

Գործակալություն է կոչվում Հանրային ռեգիստրի ազգային գործակալությունը և դա չի նշանակում, որ այն աշխատում է գործակալների համար։ Սա իրականում ընդունված տերմին է և նշանակում է շահերի կրող»,- ասել է «Վրացական երազանքի» նախագահը «Ռուսթավի 2»-ի եթերում։

Կոբախիձեն համաձայն չէ «Գիրչի» կուսակցության անդամ, պատգամավոր Իագո Խվիչիայի այն գնահատականին, որ իրենք ցանկանում են Վրաստան բերել գործակալների մասին օրենքը «ռուսական համատեքստով»։ «Մենք Վրաստանում ունե՞նք ռուսական ոճի կառավարում: Ինչպե՞ս կարելի է ռուսական համակարգն ու ռեժիմը համեմատել մեր համակարգի ու իրավիճակի հետ։ Ինչ վերաբերում է համատեքստին, ապա կարելի է խոսել Արևմուտքում փորձված օրենսդրության ներդրման մասին: Համատեքստը ճիշտ նույնն է, ինչ Արևմուտքում»,- ասում է Կոբախիձեն։

Դեռ հայտնի չէ, թե արդյոք «Վրացական երազանքը» կաջակցի «Ժողովրդի ուժի» օրինագծին, թեև որոշ պատգամավորներ դրական են վերաբերվում դրան։ Ընթացակարգային հարցերի և կանոնակարգային հանձնաժողովի նախագահ Իրակլի Քադագիշվիլիի խոսքով՝ իր համար ընդունելի է օրենքի նախագծի հիմնական ոգին՝ «ամենուր և ամեն ինչում պետք է թափանցիկություն լինի»։

Թեև «Ժողովրդի ուժի» անդամները պնդում են, որ Արտաքին ազդեցության թափանցիկության մասին օրինագիծը հիմնականում հիմնված է Միացյալ Նահանգների համապատասխան օրենսդրության վրա, ԱՄՆ Պետդեպարտամենտից ասում են, որ օրինագիծը հիմնված է Ռուսաստանի և Հունգարիայի նմանատիպ օրենսդրության վրա, այլ ոչ թե ԱՄՆ-ի որևէ օրենքի: Գերատեսչության խոսնակ Նեդ Փրայսի խոսքով՝ առաջարկվող օրենքը կբացառի և կխլացնի Վրաստանի քաղաքացիների անկախ ձայնը՝ պոտենցիալ վտանգ ստեղծելով Վրաստանի եվրատլանտյան ինտեգրման համար։

Օրենքի նախագծով «օտարերկրյա ազդեցության գործակալներ» են համարվում.

• Բոլոր ոչ ձեռնարկատիրական (ոչ առևտրային) իրավաբանական անձինք, հասարակական կազմակերպությունները, որոնց տարեկան եկամուտի 20 տոկոսից ավելին արտերկրից ստացված ֆինանսավորում է: Նման ֆինանսավորում ստանալիս Վրաստանի օրենսդրության վրա հիմնված պետական ​​կազմակերպությունները կամ սպորտային ֆեդերացիաները չեն համարվի որպես «օտար ազդեցության գործակալներ»,
• Հեռուստաընկերությունները, որոնց եկամուտների ավելի քան 20%-ը «օտար ուժերից» է,
• Զանգվածային լրատվության միջոցները, ներառյալ թերթերը և առցանց լրատվամիջոցները, որոնց եկամուտների ավելի քան 20%-ը ստացվում է «օտար ուժերից»։ Լրատվամիջոցների դեպքում այն չի վերաբերում գովազդին։
• Հասարակական և լրատվական կազմակերպությունները կգրանցվեն որպես «օտարերկրյա ազդեցության գործակալներ» Հանրային ռեգիստրի ազգային գործակալության կողմից։ Վարչական տույժեր կկիրառվեն գրանցումից խուսափած սուբյեկտների նկատմամբ: Տուգանքի վճարումը սուբյեկտին չի ազատի որպես «օտարերկրյա ազդեցության գործակալ» գրանցվելու պարտականությունից։

Այս թեմայով՝

Կոբախիձեն ստում է, երբ ասում է, որ NGO-ների ֆինանսավորումը թափանցիկ չէ