Ճիաթուրայում գործադուլ հայտարարած հանքափորները հացադուլ են սկսել

«Արդեն յոթերորդ օրն է, այսքան մեծ հանրահավաքներ ենք անում, չնչին գումար ենք խնդրում, մինչ օրս ոչ մի արդյունք չի տվել։ Ես զգուշացրել եմ նրանց [գործատուին], որ եթե նրանք չգան նվազագույնի և չանեն այն, ինչ պարտավոր են անել, ապա պահանջները կփոխվեն։ Այսօր մեր անվերապահ պահանջներից մեկը 40 տոկոս աշխատավարձի բարձրացումն է։ Մենք այստեղ կլինենք այնքան ժամանակ, քանի դեռ նրանք զիջումների չեն գնում ու ողջամիտ որոշումներ չեն կայացնում»,- ասել է աշխատակիցներից Մերաբ Սարալիձեն։

Հարյուրավոր հանքագործներ գործադուլ են հայտարարել այն բանից հետո, երբ ընկերությունը հրաժարվել է եռամսյա հարկադիր դադարից հետո հանքեր վերադարձածներին խոստացված բարձր աշխատավարձը տալ՝ փոխարենը փոխելով նրանց աշխատանքային գրաֆիկը: Աշխատակիցների խոսքով՝ նոր պլանի համաձայն՝ իրենք պետք է 30-40 տոկոսով ավելի աշխատանք կատարեն՝ առանց աշխատավարձի բարձրացման։

«Երբ փետրվարի 1-ին մեզ կանգնեցրին և ժամանակավոր ուղարկեցին արձակուրդի 60 տոկոս աշխատավարձով, մեզ խոստացան, որ երբ վերադառնանք նորմալ ռեժիմին, 12 տոկոսով կբարձրացնեն մեր աշխատավարձը, բայց երբ գնացինք աշխատանքի, ասացին, որ մեր աշխատավարձը կավելանա ընդամենը 5 տոկոսով, ոչ ավելին։ Բացի այդ,

Նրանք մեզ այլ աշխատաոճ են առաջարկում, ինչը բացարձակապես անընդունելի է մեզ համար, բոլորի համար, քանի որ դա մեխանիկորեն նշանակում է, որ մենք պետք է ընկերության համար արտադրենք մոտ 40%-ով ավելի արտադրանք, քան նախորդ տարվա պլանը, և միևնույն ժամանակ մենք չունենանք աշխատավարձի բարձրացում։ Աշխատավարձը չի բարձրանա և կավելանա միայն աշխատանքը, սա տրամաբանության մեջ չի տեղավորվում։ Մենք բողոքում ենք, և որոշումն ընդունված է։ Դա միայն կփոխվի, եթե ընկերությունը զիջումների գնա»,- նշում է Սարալիձեն։

Հանքագործների պահանջներն են՝ 40%-ով աշխատավարձի բարձրացում, գործող աշխատանքային գրաֆիկի/պլանի անցում մինչև 2023 թվականի փետրվարի 1-ը գործող պլանին, բանկային վարկերի տոկոսների կասեցում և վճարման հետաձգում, մինչ այժմ կուտակվածի վճարումը, ապահովագրության փոփոխություն և պայմանների բարելավում, արձակուրդից օգտվելու հնարավորություն, աշխատողներին աշխատանք սկսելու հնարավորություն, սարքավորումների թարմացում, բարելավում, փոփոխություն, սննդի բարելավում, աշխատակիցներին առողջարանից օգտվելու միջոցների տրամադրում, ինչպես դա արվում էր մինչև փետրվարի 1-ը, բյուլետենի օգտագործման դեպքում դրա 100%-անոց փոխհատուցում, հունիսի 7-ից մինչև ձեռնարկությունում աշխատանքային գործընթացի վերականգնումը բաց թողնված օրերի 100% փոխհատուցում, վերահսկողություն անվտանգության ամենաբարձր մակարդակով, ՍՊԸ-ների չեղարկում և վերամիավորում մեկ ընկերության մեջ, բաց հանքի միջոցով նոր տարածքներ շահագործելիս հաշվի առնել տեղի բնակչության կարծիքը։

«Ջորջիան Մանգանեզը» աշխատակիցների աշխատանքային պայմանների փոփոխության անհրաժեշտությունը բացատրում է ֆեռոհամաձուլվածքների պահանջարկի նվազման և համաշխարհային շուկայում ցածր գների պատճառով առաջացած ճգնաժամով։ Ընկերության ֆինանսական տնօրեն Գիորգի Տատիշվիլին bm.ge-ին տված հարցազրույցում ասել է, որ «Ջորջիան Մանգանեզն» ակնկալում է տարեկան 28-30 մլն դոլարի վնաս, և իրենց նպատակն է կրկնակի կրճատել այդ կորուստը։

«Փետրվարից մայիս «Ջորջիան Մանգանեզը» արտահանում չի իրականացրել։ Փոքր վաճառքներ են իրականացվել պահեստային մնացորդներից, որոնք մենք կուտակել ենք նախորդ ժամանակահատվածում: Այս ընթացքում, թեև արտադրական գործընթացը կասեցվել է, աշխատակիցները ստացել են իրենց աշխատավարձի 60%-ը, պահպանվել են ապահովագրական փաթեթները, կասեցվել են աշխատավարձերի կանխավճարները, և մենք բավականին արդյունավետ համագործակցել ենք առևտրային բանկերի հետ և օգնել նրանց հետաձգել վարկերը։ 720 աշխատողների աշխատանքային ռեժիմի փոփոխության վերաբերյալ Ճիաթուրայում հայտարարված գործընթացը հենց այն է, որով ընկերությունը մտադիր է կրճատել 28-30 միլիոնանոց դեֆիցիտը։ Դրանցից մեկն աշխատանքային ռեժիմի փոփոխությունն է, երեք հերթափոխի անցումը»,- ասել է Գիորգի Տատիշվիլին։

Նրա խոսքով, «Ջորջիան Մանգանեզի» նոր ղեկավարությունը կարծում է, որ աշխատանքային պայմանների փոփոխությունը համահունչ է բիզնես սկզբունքներին։

«Ջորջիան Մանգանեզը» Վրաստանի խոշորագույն հանքարդյունաբերողն է՝ հարյուրավոր միլիոնների շրջանառությամբ և տարեկան 96 միլիոն շահույթով։ Ընկերությունը 2017 թվականի մայիսից կառավարվում է կառավարության կողմից նշանակված հատուկ կառավարչի կողմից։ 2023 թվականի մայիսին, դատարանի որոշմամբ, ընկերությունում նոր հատուկ կառավարիչ է նշանակվել Բեսիկ Կիրթաձեն։