Լրահոս

Ըստ Կոլոմինայի՝ չափազանց կարևոր է Վրաստանի արձագանքը այն պահին, երբ բոլորը պետք է աջակցեն Ուկրաինային։

«Մենք պետք է շատ հստակ լինենք, բոլորս պետք է լինենք Ուկրաինայի կողքին։ Մենք դա ակնկալում ենք Վրաստանից և մյուս բոլոր գործընկերներից։ Այն արձագանքները, որոնք մենք կարդում էինք, անշուշտ մտահոգիչ են մեզ համար և այդ մտահոգությունները փոխանցել ենք ձեր իշխանություններին... Մեզ դուր չի գալիս Մոսկվայի այս որոշումը, բայց սա միակողմանի որոշում էր։

Մտահոգությունն ավելի շատ վերաբերում է ձեր խորհրդարանի որոշ անդամների և կառավարության անդամների արձագանքներին, քանի որ, ինչպես ասացի, սա կրիտիկական պահ է մեզ համար՝ շարունակելու աջակցել Ուկրաինային: Սա առաջնահերթություն է բոլորիս համար, և այն պետք է առաջնահերթություն լինի մեր բոլոր գործընկերների համար, բայց նաև այն պատճառով, որ սա որոշակի տարածք է ստեղծում Ռուսաստանի կողմից պատժամիջոցների հնարավոր շրջանցման համար:

«Մենք իշխանությունների հետ խոսել ենք այն աշխատանքի մասին, որը նրանք անում են պատժամիջոցների շրջանցումը կանխելու համար, նրանք լավ աշխատանք են կատարում շատ առումներով, բայց արձագանքները, որոնք մենք տեսել ենք, առնվազն ստվեր են գցում ներուժի վրա, որ Ռուսաստանը այստեղ որոշ տարածք կգտնի պատժամիջոցները շրջանցելու համար»,- ասել է Խավիեր Կոլոմինան։

ՆԱՏՕ-ի գլխավոր քարտուղարի ներկայացուցչի խոսքով՝ Վրաստանի իշխանություններին կոչ է արվել ձեռնարկել համապատասխան միջոցներ՝ պատժամիջոցների շրջանցումը թույլ չտալու համար։

Մայիսի 10-ին Ռուսաստանի նախագահ Վլադիմիր Պուտինը չեղարկել է 2019 թվականի հունիսի 21-ին Ռուսաստանի և Վրաստանի միջև ուղիղ չվերթները արգելելու մասին որոշումը։ Պուտինի հրամանագրով Վրաստանի քաղաքացիների համար չեղյալ է հայտարարվել նաև 2000 թվականից գործող վիզային ռեժիմը։

Վրաստանի կառավարությունը դրական է գնահատել այդ որոշումները և արդեն երկու ռուսական ավիաընկերությունների իրավունք է տվել չվերթներ իրականացնել Թբիլիսի-Մոսկվա-Թբիլիսի, Սոչի-Թբիլիսի-Սոչի և Մոսկվա-Քութայիսի-Մոսկվա երթուղիներով։ Մոսկվայի ուղղությամբ թռիչքներ է սկսել նաև վրացական Georgian Airways ընկերությունը։ Իշխանությունները պնդում են, որ թույլ չեն տա թռիչքներ իրականացնել պատժամիջոցների տակ գտնվող ավիաընկերություններին և ինքնաթիռներին։

«Վրաստանն ունի իր ազգային շահերն ունենալու ինքնիշխան իրավունքներ։ Մենք Ռուսաստանի հետ ունենք տնտեսական և առևտրային հարաբերություններ, ունենք մեկ միլիոն վրացի, էթնիկ վրացիներ, որոնք Ռուսաստանում ապրում են որպես սփյուռք, իսկ Ռուսաստանի հետ ուղիղ չվերթները, կարծում եմ, սովորական դեպք է։ Եվ դա չի նշանակում, որ մենք Ռուսաստանի հետ ինչ-որ քաղաքական կոնսուլտացիաներ ենք իրականացնում... Դա մեր տնտեսական և առևտրային հարաբերությունների մի մասն է, ինչպես Եվրամիությունն ու Ամերիկան ​​են անում Ռուսաստանի հետ։ Ռուսաստանի հետ մենք ունենք սովորական առևտրային հարաբերություններ»,- մայիսի 24-ին Կատարի տնտեսական ֆորումին իր ելույթի ժամանակ ասել է Վրաստանի վարչապետ Իրակլի Ղարիբաշվիլին։

Եվրամիությունը կոչ է արել Վրաստանի իշխանություններին միանալ ավիացիայի ոլորտում Ռուսաստանի դեմ Եվրամիության և մի շարք միջազգային գործընկերների կողմից սահմանված պատժամիջոցներին։

ԱՄՆ կառավարությունը կարծում է, որ այսօր, երբ արևմտյան հասարակությունն ամբողջությամբ հեռացել է ռուսական ռեժիմից, ժամանակը չէ, որ որևէ երկիր մեծացնի իր ներգրավվածությունը Ռուսաստանի հետ։ Ըստ Պետդեպարտամենտի՝ ​​վրացական օդանավակայաններում գործող ընկերությունները կարող են ենթարկվել պատժամիջոցների, եթե նրանք սպասարկեն ներմուծման և արտահանման հսկողության տակ գտնվող ինքնաթիռներին։