ԵՄ-ին Ուկրաինայի անդամակցության շուրջ բանակցությունները հավանաբար կսկսվեն հունիսին

Դիվանագետները, ովքեր ցանկացել են անանուն մնալ, Politico-ին ասել են, որ այժմ ինտենսիվ աշխատանք է տարվում՝ համոզելու Հունգարիայի կառավարությանը համաձայնել բանակցություններ սկսելուն:

Դիվանագետներից մեկը ենթադրել է, որ Հունգարիան կարող է խուսափել բանակցություններ սկսելուց մինչև հուլիսին Բելգիայից ստանձնի Եվրոպական խորհրդի վեցամսյա ռոտացիոն նախագահությունը:

Ուկրաինայի՝ ԵՄ-ին անդամակցելու գործընթացի հաջորդ քայլը միջկառավարական համաժողովի միջոցով Ուկրաինայի հետ պաշտոնական բանակցությունների մեկնարկն է։ Բելգիայի պաշտոնյաները համաժողովը նշանակել են հունիսի 25-ին:

Բանակցությունները սկսելու համար Եվրամիության 27 երկրները պետք է պայմանավորվեն այսպես կոչված բանակցությունների շրջանակի շուրջ, որի նախագիծը Եվրահանձնաժողովը պատրաստել էր այս տարվա մարտին։ Երկու դիվանագետ Politico-ին ասել են, որ բանակցությունները լավ են ընթանում տեխնիկական մակարդակով, և նրանք ակնկալում են, որ առաջիկա շաբաթներին նոր նախագիծ կուղարկվի ԵՄ դեսպաններին, որպեսզի նրանք լուծեն ամենակարևոր խնդիրները:

Ուկրաինայում Եվրամիության դեսպան Կատարինա Մատերնովան կարծում է, որ Ուկրաինան պատրաստ է սկսել անդամակցության բանակցությունները։

2023 թվականի դեկտեմբերին Եվրոպական խորհուրդը որոշեց սկսել անդամակցության բանակցությունները թեկնածու երկրների՝ Ուկրաինայի և Մոլդովայի հետ։ Վրաստանի թեկնածուի կարգավիճակը տրվել է այն վերապահումով, որ կառավարությունը քայլեր է ձեռնարկելու 9 ուղղություններով։

Այն բանից հետո, երբ Վրաստանի իշխող՝ «Վրացական երազանք» կուսակցությունը կրկին օրակարգ բերեց այսպես կոչված օտարերկրյա գործակալների մասին ռուսական օրենքը՝ Եվրախորհրդարանը բանաձև ընդունեց, որում ասվում է, որ Վրաստանի հետ անդամակցության բանակցությունները չպետք է սկսվեն, քանի դեռ այս օրենքը Վրաստանի իրավական համակարգի մաս է կազմում։