Երկու ամիս է՝ ինձ տուժող չեն ճանաչում, հետաքննություն հատուկ չեն իրականացնում. Էլիսաշվիլի

«Արդեն երկու ամիս է, ինչ իմ նկատմամբ՝ որպես պատգամավոր, որը սովորաբար պաշտպանվում է անձեռնմխելիությամբ, ոստիկանները օրը ցերեկով կառավարության շենքի մոտ բռնություն կազմակերպեցին։ Այս ամբողջ բռնությունը, երբ նրանք անխնա հարվածում էին ինձ ընկած վիճակում, երևում էր կադրերում։ Այս կադրերի պատճառով Հատուկ քննչական ծառայությունը ստիպված է եղել... նրանց անունը հնչեղ է, բայց իրականում դա ամոթալի կազմակերպություն է։ Նրանք երկու ամիս հետաքննություն են անցկացնում։ Հետաքննության էությունն ու արդյունքն այն է, որ այս երկու ամսվա ընթացքում ոչ մեկին մեղադրանք չի առաջադրվել, անգամ մեկ ոստիկանի։ Սակայն պարզ երևում են ինձ ծեծող ոստիկանները։ Նրանք չեն էլ հարցաքննվում, փաստ է, որ ձերբակալված չկա։

Ավելին, Հատուկ քննչական ծառայությունն արդեն երկու ամիս է՝ ինձ տուժող չի ճանաչում։ Էլ ինչպես տուժեմ: Կոտրեցին կողերս, դեմքիս երևում էր, որ ծեծի եմ ենթարկվել, կադրերում էլ երևում էր, որ վճռականորեն ծեծում էին ինձ։ Այսպիսի խայտառակ երկրում ենք ապրում, երկիրն ունի այսպիսի ամոթալի կառավարություն, քննչական կառույցներ։

Նրանք հետաքննություն հատուկ չեն անցկացնում։ Ես չեմ ճանաչվել որպես տուժող, քանի որ եթե ինձ ճանաչում են որպես տուժող, ինձ պետք է հասանելի լինեն բոլոր նյութերը՝ ինձ և իմ փաստաբանին։ Նրանք չեն ցանկանում բացահայտել այդ ոստիկանների ինքնությունը։

Ինչու են նրանք դա անում: Որովհետև հանցավոր բանդայի վերածված այսօրվա «Վրացական երազանքը» հենվում է երկու ռեսուրսի վրա։ Սրանք այն ոստիկաններն են, ովքեր փողոցում դիմավորում են մարդկանց և հարձակվում նրանց վրա, արյունահոսություն են անում, նույնիսկ դիմակ չեն կրում, և երկրորդ՝ բռնարար ոստիկանները, ովքեր եթե քայլեր չձեռնարկեն կտապալվի այս ամբողջ բռնարար-ավազակապետությունը։ Այդ իսկ պատճառով նրանք չեն հետաքննում»,- ասել է Ալեկո Էլիսաշվիլին։

Պատգամավորի խոսքով՝ իշխանափոխությունից հետո բռնություն գործադրող ոստիկանները «կպատժվեն շատ խիստ»։

Հատուկ ջոկատայիններն ու ոստիկանությունը բազմիցս հարձակվել են ռուսական օրենքի դեմ խաղաղ ցույցերի մասնակիցների վրա։ Ներքին գործերի նախարարության հատուկ առաջադրանքների վարչության տնօրեն Զվիադ Խարազիշվիլին՝ նույն ինքը Խարեբան, լրագրողներին ասել է, որ հանրահավաքներին ծեծի է ենթարկում «սրիկաներին», որոնց ցուցակն ունի։ Ալեքսանդր Էլիսաշվիլիի նկատմամբ ֆիզիկական բռնություն է գործադրվել ապրիլի 17-ին, իսկ մեկ այլ պատգամավորի, «Միացյալ ազգային շարժման» նախկին նախագահ Լևան Խաբեիշվիլիի նկատմամբ՝ ապրիլի 30-ին։ Մայիսի 14-ին ՆԳՆ աշխատակիցները ծանր վիրավորել են քաղաքացիական ակտիվիստ Դավիթ Քացարավային։ Էլիսաշվիլին պատմել է, որ պարեկային ոստիկանության բաժնի տնօրեն Վաժա Սիրաձեի ցուցումով մի քանի ոստիկան քաշքշել են իրեն, ինչի ժամանակ նա վայր է ընկել ու ծեծի ենթարկվել, իսկ Խաբեիշվիլիի խոսքով՝ Զվիադ Խարազիշվիլին իր նկատմամբ դիտավորյալ պատժիչ գործողություն է իրականացրել։