Ռուսաստանի հետ ուղիղ չվերթները հակասում են եվրաինտեգրմանը. Լիտվայի ԱԳՆ

«Մենք հիասթափությամբ նշում ենք, որ Ռուսաստանի և Վրաստանի միջև թռիչքների վերականգնումը հակասում է Վրաստանի շահերին և այն ճանապարհին, որը նա ընտրել է Եվրամիությանն ու եվրատլանտյան կառույցներին ինտեգրվելու համար։ Մենք ևս մեկ անգամ կոչ ենք անում Վրաստանին միանալ Ռուսաստանի դեմ ԵՄ պատժամիջոցներին, այդ թվում՝ ավիացիոն ոլորտում»,- ասվում է նախարարության Twitter-ում հրապարակված հայտարարության մեջ։

Գրեթե չորս տարի անց Ռուսաստանի և Վրաստանի միջև ուղիղ չվերթները վերականգնվեցին։ Մոսկվայից Թբիլիսի առաջին չվերթը՝ մայիսի 19-ին իրականացրել է ռուսական «Ազիմուտ» ավիաընկերությունը։ Չվերթով Թբիլիսի են ժամանել վրացի ռուսամետ քաղաքական գործիչներ, ակտիվիստներ և գործարարներ՝ Վալերի Կվարացխելիան, Դիմիտրի Լորթքիփանիձեն, Մերաբ Ճիքաշվիլին և Մամուկա Փիփիան։ Ճիքաշվիլին, ով «Համերաշխություն հանուն խաղաղության» կազմակերպության նախագահն է, Վրաստանի քաղաքացիների անունից շնորհակալություն է հայտնել Վլադիմիր Պուտինին թռիչքների վերսկսման համար։

«Azimuth Airlines»-ը ռուսական առաջին ավիաընկերությունն է, որին Պուտինի հրամանագրի հրապարակումից հետո Վրաստանի կառավարությունը թույլտվություն է տվել ուղիղ չվերթներ իրականացնել Մոսկվա-Թբիլիսի-Մոսկվա երթուղով։ Վրաստանում նրան ​​կսպասարկի Վալերի Կվարացխելիայի որդու ընկերությունը՝ «Աերո Հենդլինգ Ջորջիա» ՍՊԸ-ն։ Ընկերությունը գրանցվել է Հանրային ռեգիստրի ազգային գործակալության կողմից ընդամենը մեկ ամիս առաջ՝ 2023 թվականի ապրիլի 21-ին։ Նրա տնօրենն ու բաժնետոմսերի 60%-ի սեփականատերը Դավիթ Կվարացխելիան է։

Վրացական «Georgian Airways» ընկերությունը մայիսի 20-ից թռիչքներ կիրականացնի Թբիլիսի-Մոսկվա-Թբիլիսի ուղղությամբ, իսկ հունիսի 2-ից՝ շաբաթական երեք անգամ ռուսական Red Wings ավիաընկերությունը Սոչի-Թբիլիսի-Սոչի և Մոսկվա- Քութայիսի-Մոսկվա ուղղությամբ:

Եվրամիությունը կոչ է արել Վրաստանի իշխանություններին միանալ ավիացիայի ոլորտում Ռուսաստանի դեմ Եվրամիության և մի շարք միջազգային գործընկերների կողմից սահմանված պատժամիջոցներին։ ԵՄ արտաքին հարաբերությունների և անվտանգության քաղաքականության գերագույն ներկայացուցիչ Ջոզեֆ Բորելի խոսնակ Պիտեր Ստանոն ասել է, որ թռիչքները վերսկսելու վրացական իշխանությունների որոշումը մտահոգություն է առաջացնում երկրի եվրոպական ուղու և Վրաստանի կողմից Ասոցացման համաձայնագրով ստանձնած պարտավորությունների կատարման առումով, ինչը ենթադրում է արտաքին քաղաքականության մեջ Եվրամիության որոշումների հետ համապատասխանեցում։

Այս թեմայով՝

ԵՄ քաղաքականությանը ենթարկվելու համար մենք պետք է լինենք ԵՄ անդամ. վարչապետ